Foto: Májilistiń baspasóz qyzmetinen
Búgin Májilis otyrysynda «Aýyl» fraktsiiasynyń depýtaty Anas Baqqojaev eldegi agrarlyq salanyń birqatar máselelerin kóterip, azyq-túlik qaýipsizdigi týraly zań jobasynyń qaita qaralýyn talap etip, Úkimet basshysy Oljas Bektenovke saýal joldady dep habarlaidy "Ult Aqparat".
"Ekonomikanyń ósý qarqyny boiynsha agrarly sala eń tómengi kórsetkishke ie. 2005-shy jyldan beri aýyl sharýashylyǵy boiynsha qabyldanǵan birde-bir memlekettik baǵdarlamala sońyna deiin iske aspaǵan. Agrarly saiasat turaqsyz bolǵandyqtan sońǵy 20 jylda sýbsidiia berý erejeleri 57 ret ózgergen. Nátijesinde aýyl sharýashylyǵy biýdjettik qarajattyń eń kóp urlanatyn salalardyń tiziminde aldyńǵy úshtikten túspei júr", - dedi depýtat óz sózinde.
Depýtat Baqqojaevtyń sózinshe sońǵy 10 jylda dúken sórelerindegi importtyq ónimniń úlesi 3 ese ósken.
"Qanshama baǵdarlama jasalsa da elimizdegi qaita óńdeý kásiporyndardyń naqty óndiris qýattylyǵy esh ýaqytta 30 paiyzdan asqan emes. Onymen qosa birqatar eksporttyq baǵyttardy ýysymyzdan shyǵaryp aldyq", - dep qynjyldy ol.
Sondai-aq depýtattyń aitýynsha alypsatarlar baǵany bilgenderinshe qoiyp, úlken paidaǵa kenelip otyr. Olardyń paidasy fermerlerden 4 ese kóp kórinedi.
Anas Baqqojaev sońǵy 5 jylda jazdaǵy qurǵaqshylyq pen qys mezgilindegi mal juty qalypty jaǵdaiǵa ainalǵanyna alańdaýshylyq bildirdi.
"Byltyrǵy satylmai qalǵan júgeri men piiaz problemalaryn qaitpekpiz? Aýyl dúkenderinde aǵzaǵa qajet barlyq taýarlar bar dep aitý qiyn. Elektr energiiasy, jylý men kommýnaldyq tarifterdiń ósýi jańadan qurylǵan jobalardyń damýyna tusaý bolyp otyr. Sońǵy jyldary agrosalaǵa jeke investitsiialar álsin-álsin kele bastaǵan edi, alaida táýekelge tap bolǵanda memleket qol ushyn sozbaǵan soń olardyń barlyǵy aýyl sharýashylyǵy biznesinen at-tonyn ala qashty. Kóptegen sharýashylyqtar satylyp jatyr", - dep, osynyń barlyǵy azyq-túlik qaýipsizdigine arnalǵan arnaiy zańnyń joqtyǵynan ekenin jetkizdi.
Osylaisha, «Aýyl» partiiasy azyq-túlik qaýipsizdigi týraly zań jobasyn ázirlep, Úkimettiń qaraýyna jibergen eken, alaida tiisti qoldaý tappapty.
"Biz usynǵan zań jobasynda naqty nátijege qol jetkizetin, fermerlerdiń baiaǵydan kútken reformarǵa jol ashatyn birneshe jańa normalar usyndyq. Olarmen durystap tanyssańyz, kóptegen máselege kózińiz ashylady. Alaida bizdiń usynǵan novellalardy eshkim durystap saraptaǵan joq! Eger barlyq zańdarymyz durys bolsa, onda nege Qazaqstanda «azyq-túlik daǵdarysy» degen túsinik bekitilmegen? Onyń negizgi faktorlary qandai? «Ash qalýymyz múmkin» degen dabyldy qandai jaǵdaida qaǵamyz? Júieli túrde aldyn-ala boljam nege jasamaimyz? Suraq kóp, jaýap joq", - dedi Baqqojaev.
Osyǵan bailanysty «Aýyl» fraktsiiasynyń depýtattary Azyq-túlik qaýipsizdigi týraly daiyndaǵan zań jobasyn ýákiletti ministrliktiń deńgeiinde emes, Úkimettiń deńgeiinde qaita qaralyp, pysyqtalýyn talap etedi.
