Nursultan Nazarbaev «Shabyttandyrýshy ósim: adamdar, qalalar, ekonomikalar» atty HII Astana ekonomikalyq forýmyna qatysty, dep habarlaidy "Ult aqparat" Aqordaǵa silteme jasap.
Forýmnyń plenarlyq otyrysynyń qatysýshylary aldynda sóz sóilegen Qazaqstannyń Tuńǵysh Prezidenti Astana ekonomikalyq forýmynyń óńirlik jáne jahandyq syn-qaterlerge tótep berý úderisindegi mańyzdy rólin atap ótti.
– Aldyńǵy jyldary osy jerde talqylanǵan usynystar men ideialar Qazaqstanǵa jahandyq syn-qaterlerdi ýaqtyly eskerip, qiyndyqtardy tabysty eńserýge múmkindik berdi. Damýdyń qazaqstandyq modeli qalyptasqan jaǵdailar men boljamdarǵa qaramastan óziniń turaqtylyǵy men tiimdiligin dáleldegenin bilesizder. Biz órshil maqsattar qoiyp, solarǵa qol jetkize aldyq, – dedi Nursultan Nazarbaev.
Plenarlyq otyrys barysynda Elbasy jahandyq ekonomikadaǵy sońǵy ózgerister týraly pikirin ortaǵa salyp, memleketaralyq dialogty jaqsartý úshin birqatar ideia usyndy.
Qazaqstannyń Tuńǵysh Prezidenti sóilegen sózinde álemdik ekonomikany damytý, tsifrlandyrý, bilim berý úderisteriniń transformatsiiasy, adam kapitalyna qoiylatyn talaptardyń kúsheiýi, sondai-aq ýrbanizatsiia perspektivalary siiaqty máselelerge toqtaldy.
– Ekonomikalyq josparlaýdyń kókjiegi tarylyp kele jatqanyn bilesizder. Kúrdeli jaǵdailardan shyǵý joldaryn Birikken Ulttar uiymy, G-20, Dúniejúzilik saýda uiymy siiaqty halyqaralyq uiymdar men forýmdar aiasynda tabýǵa bolady. Birlese talqylaý men basqarýǵa kóshetin kez keldi. Taiaýda Beijińde ótken «Bir beldeý, bir jol» II forýmynda men «Úsh D» jańa geosaiasi ahýaly negizinde turaqty jahandyq arhitektýrany qalyptastyrýdy usyndym. Bul degenimiz – úsh deńgeide dialog ornatý, – dedi Nursultan Nazarbaev.
Sonymen qatar, Elbasy Astana ekonomikalyq forýmy alańynda halyqaralyq dialog formatyn keńeitý úshin sharalar qabyldaýdy usyndy.
– Osy jerde aitylǵan ideialar álemdik saiasat pen ekonomikanyń eń kúrdeli jáne ózekti máselelerine qatysty sheshimder tabýǵa septigin tigizetinine senimdimin, – dedi Qazaqstannyń Tuńǵysh Prezidenti.
