Qazaqstanda AES qurylysyn júrgizbes buryn ekologtar balamaly energiia kózderi men olardyń áleýetine nazar aýdarýǵa shaqyrady, dep habarlaidy QazAqparat tilshisi.
«Jasyl ekonomika úshin» jáne G-Global damý koalitsiiasy» ZTB basshysy Saltanat Temirqulovanyń aitýyna qaraǵanda, Qazaqstanda AES qurylysyn júrgizýden buryn eń aldymen jasyl ekonomika qaǵidattaryn eskere otyryp, barlyq nysandarǵa aýdit júrgizý kerek.
«Búgingi tańda elektr qýatynyń 70 paiyzy turǵyn úi sektorlarynda únemsiz paidalanylyp jatqanyn bilemiz. TÚKSh jańǵyrtý jumystary ne úshin júrgizilip jatyr? Sebebi, jylýmen, elektr qýatymen qamtý júielerin ózgertý kerek. Jylý joldarynda úlken shyǵyn bar. AES qurylysyn júrgizý máselesi nelikten kóterilip otyr? Sebebi, elektr qýaty jaǵynan tapshylyq bar. Eń aldymen, energiia únemdeýshi sharalar men jelilerdi jańǵyrtý esebinen elektr qýatynyń jetispeýshiligin sheshýge bola ma degen suraqqa qatysty aýdit júrgizý kerek», - dedi Saltanat Temirqulova elordada ótken baspasóz máslihatynda.
Ol óz sózinde «jasyl ekonomikaǵa» ótý boiynsha tujyrymdamaǵa sáikes, Qazaqstanda elektrmen qamtý balansynyń 50 paiyzy balamaly qýat kózderiniń esebinen bolýy tiis ekenin jetkizdi.
«Jasyl» qoǵamdyq uiym retinde eń aldymen balamaly qýat kózderiniń - kún men jelden, sýdan óndiriletin energiianyń áleýetine nazar aýdarylsa deimiz. Bul áleýette trillion kilovatt qýat jatyr. Al keleshek - balamaly qýat kózderinde ekeni baiaǵydan aitylyp kele jatyr», - deidi sarapshy.
Eske sala ketsek, QR Prezidenti Qasym-Jomart Toqaevtyń RF-ke resmi sapary barysynda Resei Prezidenti Vladimir Pýtin eki el arasyndaǵy energetikalyq saladaǵy yntymaqtastyqty keńeitýdi jáne Qazaqstanda AES qurylysyn reseilik tehnologiiamen júrgizýdi usynǵan edi.
«Beibit atom salasynda yntymaqtastyq damyp keledi, ýran óndirý men baiytý boiynsha qazaqstandyq-reseilik alty kásiporyn jumys isteýde. Ózara is-qimyldyń jańa formatyna kóshýdi, osy oraida reseilik tehnologiialarmen AES salý múmkindigin usynamyz», - dedi V. Pýtin.
Óz kezeginde energetika ministri Qanat Bozymbaev reseilik taraptyń Qazaqstanda atom elektr stansasyn salý usynysyna qatysty pikir bildirgen bolatyn.
