Ekologiialyq etikany qalyptastyrýǵa úndeitin ekosofiia tujyrymdamasy bekitilip, kelesi jyldyń josparyna engiziledi. Bul týraly Aqordada ótken Qoǵamdyq sanany jańǵyrtý jónindegi ulttyq komissiia otyrysynda QR Aqparat jáne qoǵamdyq damý ministri Aida Balaeva aitty, dep habarlaidy QazAqparat.
«Qurmetti Qyrymbek Eleýuly! Jańa aityp óttim, álemdi sharlaǵan KOVID-19 bizdiń josparymyzǵa tikelei áserin tigizdi. Osy oraida, jyl basyndaǵy Ózińizdiń Ulttyq komissiia otyrysynda da, tamyz aiyndaǵy «Ana tili» gazetindegi maqalańyzda da kórsetilgen tapsyrmańyzǵa sai pandemiia týdyrǵan qoǵamdaǵy ózgeristerge bailanysty birqatar jańa arnaiy jobalar iske qosyldy«, - dedi ministr otyrysqa tóraǵalyq etken QR Memlekettik hatshysy Qyrymbek Kósherbaevqa qarata.
Osy oraida ol atalǵan jobalarǵa keńinen toqtalyp ótti.
»Jalpy, bul baǵytta jyl basynda ministrlik janyndaǵy Qoǵamdyq damý institýty 12 joba daiyndaǵan bolatyn. Onyń ishinen Prezident Ákimshiliginiń sheshimimen 4 arnaiy joba iriktelip alyndy. Olar: Elbasymyz aitqan pragmatikalyq ómir saltyna, básekege qabilettilik pen ozyq bilimge negizdelgen «Únem – qoǵam qýaty»; daraqylyq pen ysyrapshyldyq, bos maqtan men ózimshildikten arylýǵa baǵyttalǵan «Dástúr men ǵuryp»; eldiń quqyqtyq saýatyn kóterip, sanasyn ashýǵa baǵyttalǵan «Quqyqtyq mádeniet»; eńbekqorlyǵy men masyldyqtan bas tartý, kásip jasaý siiaqty qasietterin dáripteitin «Eńbek – eldiń muraty» degen arnaiy jobalar. Árine, olardyń qamtityn taqyryptyq sheńberi ataýynan áldeqaida keń«, - dedi Aida Balaeva.
Mysaly, ministrdiń aitýynsha, búgingi tańda, ásirese, qoǵamnyń ekologiialyq mádenietin kóterý óte ózekti.
»Ol týraly El Prezidenti túrli minberden aityp keledi. Sondyqtan da, biz osy saladaǵy qoǵamdyq uiymdarmen birlese otyryp, jańa ekologiialyq etikany qalyptastyrýǵa úndeitin – ekosofiia tujyrymdamasyn bekitip, kelesi jyldyń josparyna engizýdi kózdep otyrmyz. Sol siiaqty, «Dástúr men ǵuryp» arnaiy jobasy aiasynda din salasynda «As berý mádenieti» jáne «Mazar ádebi» siiaqty reglamenttik qujattardy daiyndaýdy qolǵa alsaq, «Eńbek – eldiń muraty» jobasy aiasynda NEET sanatyndaǵy jastarmen keshendi jumys júrgizýdi josparlap qoidyq«, - dedi ol.
Onyń atap ótýinshe, qazirgi tańda osy 4 arnaiy joba aiasyndaǵy praktikalyq sharalar ziialy qaýym men ártúrli áleýmettik top ókilderiniń ortaq pikirlesýi nátijesinde jasaqtalyp, qoǵam tarapynan qoldaý taýyp otyr.
Eske sala keteiik, Memlekettik hatshy Qyrymbek Kósherbaevtyń tóraǵalyǵymen ótken komissiia otyrysynda «Rýhani jańǵyrý» baǵdarlamasyn odan ári tereńdetip Ulttyq jańǵyrý kezeńine ótkizýdiń arnaiy Jol kartasyn jasaý qajet degen sheshim qabyldandy. Bul qujat asa mańyzdy ulttyq joba retinde júrgiziledi.
Ulttyq jańǵyrý jobasynyń eń basty máni – Ulttyń básekege qabilettiligin arttyrý. Bul – ulttyq jańǵyrýdyń strategiialyq maqsaty bolyp qalady. Jol kartasynda Memlekettik til mártebesin arttyrý, Bilim jáne ǵylymdy damytý, Joǵary ulttyq jáne jalpyadamzattyq qundylyqtar negizinde rýhani-adamgershilik jáne patriottyq tárbie berý, Eńbek adamyn qalyptastyrý, Aýyldy túletý siiaqty t.b keshendi is-sharalar qamtylady. Memlekettik hatshy otyrysty qorytyndylai kele, «Rýhani jańǵyrý» baǵdarlamasynyń basym baǵyttary boiynsha jumysty odan ári jandandyrý boiynsha naqty tapsyrmalar berdi.
