Elimizde mektep jasyna deiingi balalar men bastaýysh synyp oqýshylaryna arnalǵan ekologiia taqyrybyna qatysty qazaq tilinde oqýlyq shyǵarylýy kerek.
Bul týraly ekologiialyq bilimge qatysty Facebook-tegi KUN.KZ ashyq media platformasynda ótken onlain konferentsiiada aityldy, dep habarlaidy QazAqparat.
«Eń aldymen «Ekologiia pánin engizgen durys pa álde barlyq pándi ekologiialandyrý kerek pe?» degen suraqqa jaýap berýimiz kerek. Resei ekologiia týraly bir ǵana oqýlyq shyǵarý týraly sheshimdi áli qabyldaǵan joq, sebebi ol óte qiyn sharýa. Mysaly, bul pándi joǵary synyp oqýshylaryna ótkizbek bolǵan, biraq bul kezde oqýshylar kolledjge kete bastaidy. Sondyqtan barlyq pándi ekologiialandyrý tiimdi siiaqty. Ekinshiden, ekomektep, ekobalabaqsha, ekojoǵary oqý oryndaryn ashatyn bolsaq, oǵan qoiylatyn talap qandai bolatynyn jyl sońyna deiin anyqtaýymyz kerek», - deidi ekonomika ǵylymdarynyń kandidaty, professor Jaqsybek Qulekeev.
Onyń aitýynsha, Qazaqstan balalarǵa, sonyń ishinde mektep jasyna deiingi balalarǵa arnalǵan oqýlyq, tanymdyq kitap shyǵarýǵa nazar aýdarǵysy kelmeidi.
«Tipti ondai oqýlyq shyǵarǵan kúnniń ózinde ol joǵary synyp oqýshylaryna arnalǵan bolady. Sondyqtan mektep jasyna deiingi balalar men bastaýysh synyp oqýshylaryna arnalǵan ekologiia taqyrybyna qatysty qazaq tilinde oqýlyq bolýy kerek. Sondai-aq, osy taqyrypta mýltfilmder túsirilýi kerek. Eger ony jazý ne túsirýge áleýetimiz jetpese, tanymdyq kitap, mýltfilmder toptamasyn jinap, ony memlekettik tilge aýdarý kerek», - deidi ol.
Ol qazirgi ýaqytta qosymsha bilim berý, balany damytý ortalyqtary kóp bolǵanmen, atyna zaty sai emes ekenin aitty.
«Mundai jerdiń tabaldyryǵynan bastap tanymdyq máni bolýy kerek. Odan bólek, ekologiiaǵa balalardyń, eresekterdiń kózqarasy qandai ekenin bilý úshin ǵylymi, áleýmettik zertteý jumystaryn júrgizý kerek. Nur-Sultan, Almaty, Shymkentke ekomektep, ekosaiabaq salyp kórý kerek. Tipti ekosaiabaq salýǵa bolady. Al Nur-Sultanda tipti zoosaiabaq joq. Osy atalǵandar salynsa ózge óńirlerge de úlgi, ideia bolýshy edi», - deidi professor Jaqsybek Qulekeev.
Eske sala ketsek, Prezident Qasym-Jomart Toqaev 10 shilde kúni Úkimettiń keńeitilgen otyrysynda mektep baǵdarlamasyna «Balalardyń ekologiialyq bilimi» atty jańa pán engizýdi tapsyrǵan bolatyn.
