QR Ekologiia, geologiia jáne tabiǵi resýrstar ministri Maǵzum Myrzaǵaliev jumys saparymen Shyǵys Qazaqstan oblysyna keldi. Ol aldymen «Óskemen JES» JShS-ine bardy, dep habarlaidy "Ult aqparat" atalmysh vedomostvonyń Telegram-kanalyna silteme jasap.
Ministr kásiporynnyń atmosferalyq aýany lastaý deńgeiin tómendetý boiynsha júrgizip jatqan jumystarymen tanysty. Jylý elektr ortalyǵy 2014 jyldan bastap óndiriske eń ozyq qoljetimdi tehnologiialardy engizgen. Nátijesinde aýaǵa shyǵatyn qatty bólshekter 51,3%-ǵa, kúkirt dioksidi 17%-ǵa tómendegen. 2003-2019 jyldar aralyǵynda Óskemen JES-iniń ekologiialyq sharalarǵa bólgen qarjysy 7,6 mlrd teńgeden asty.
Ekologiia ministri JES-tiń jumys tehnologiiasyn odan jasyldandyra túsý qajettigin aitty.
«Óskemen qalasynda negizgi eki lastaýshy kásiporyn bar. Biri - «Qaztsink» kompaniiasy, ekinshisi jylý elektr ortalyǵy. Ásirese qysta, jelsiz aýa raiynda lastaýshy zattyń kóp bóligi JES-tan shyǵady. Shyǵaryndylar 16 myń tonnaǵa deiin jetedi. Degenmen jasyl tehnologiia boiynsha úlken jumys istelgeni kórinip tur. Shyǵaryndylar kólemin taǵy da azaita túsý maqsatynda qosymsha baǵdarlama ázirleý qajet. Qysqa ýaqyt ishinde halyq onyń nátijesin sezinýi tiis», - dedi Ekologiia ministri.
Ári qarai ekologiialyq ahýaldyń nasharlaýyn boldyrmas úshin qoldanystaǵy qazandyq agregattaryn jańartyp, tazalaý qurylǵylaryn tolyǵymen aýystyrý josparyn jasaý qajettigin atap ótti. Qazirgi ýaqytta kásiporynnyń óndiris alańynda nóser aǵyndylaryn tazalaý boiynsha qurylǵylar ornatylǵan. Al 2016 jyldan bastap Úlbi ózenine túsetin nóser aǵyndylary toqtatyldy.
Maǵzum Myrzaǵaliev jumys sapary barysynda «Kaztsink», Úlbi metallýrgiialyq zaýyttaryna, balyq sharýashylyǵy mekemelerine barýdy josparlap otyr.
