قر ەكولوگييا, گەولوگييا جەنە تابيعي رەسۋرستار مينيسترٸ ماعزۇم مىرزاعاليەۆ جۇمىس ساپارىمەن شىعىس قازاقستان وبلىسىنا كەلدٸ. ول الدىمەن «ٶسكەمەن جەس» جشس-ٸنە باردى, دەپ حابارلايدى "ۇلت اقپارات" اتالمىش ۆەدوموستۆونىڭ Telegram-كانالىنا سٸلتەمە جاساپ.
مينيستر كەسٸپورىننىڭ اتموسفەرالىق اۋانى لاستاۋ دەڭگەيٸن تٶمەندەتۋ بويىنشا جٷرگٸزٸپ جاتقان جۇمىستارىمەن تانىستى. جىلۋ ەلەكتر ورتالىعى 2014 جىلدان باستاپ ٶندٸرٸسكە ەڭ وزىق قولجەتٸمدٸ تەحنولوگييالاردى ەنگٸزگەن. نەتيجەسٸندە اۋاعا شىعاتىن قاتتى بٶلشەكتەر 51,3%-عا, كٷكٸرت ديوكسيدٸ 17%-عا تٶمەندەگەن. 2003-2019 جىلدار ارالىعىندا ٶسكەمەن جەس-ٸنٸڭ ەكولوگييالىق شارالارعا بٶلگەن قارجىسى 7,6 ملرد تەڭگەدەن استى.
ەكولوگييا مينيسترٸ جەس-تٸڭ جۇمىس تەحنولوگيياسىن ودان جاسىلداندىرا تٷسۋ قاجەتتٸگٸن ايتتى.
«ٶسكەمەن قالاسىندا نەگٸزگٸ ەكٸ لاستاۋشى كەسٸپورىن بار. بٸرٸ - «قازتسينك» كومپانيياسى, ەكٸنشٸسٸ جىلۋ ەلەكتر ورتالىعى. ەسٸرەسە قىستا, جەلسٸز اۋا رايىندا لاستاۋشى زاتتىڭ كٶپ بٶلٸگٸ جەس-تان شىعادى. شىعارىندىلار 16 مىڭ تونناعا دەيٸن جەتەدٸ. دەگەنمەن جاسىل تەحنولوگييا بويىنشا ٷلكەن جۇمىس ٸستەلگەنٸ كٶرٸنٸپ تۇر. شىعارىندىلار كٶلەمٸن تاعى دا ازايتا تٷسۋ ماقساتىندا قوسىمشا باعدارلاما ەزٸرلەۋ قاجەت. قىسقا ۋاقىت ٸشٸندە حالىق ونىڭ نەتيجەسٸن سەزٸنۋٸ تيٸس», - دەدٸ ەكولوگييا مينيسترٸ.
ەرٸ قاراي ەكولوگييالىق احۋالدىڭ ناشارلاۋىن بولدىرماس ٷشٸن قولدانىستاعى قازاندىق اگرەگاتتارىن جاڭارتىپ, تازالاۋ قۇرىلعىلارىن تولىعىمەن اۋىستىرۋ جوسپارىن جاساۋ قاجەتتٸگٸن اتاپ ٶتتٸ. قازٸرگٸ ۋاقىتتا كەسٸپورىننىڭ ٶندٸرٸس الاڭىندا نٶسەر اعىندىلارىن تازالاۋ بويىنشا قۇرىلعىلار ورناتىلعان. ال 2016 جىلدان باستاپ ٷلبٸ ٶزەنٸنە تٷسەتٸن نٶسەر اعىندىلارى توقتاتىلدى.
ماعزۇم مىرزاعاليەۆ جۇمىس ساپارى بارىسىندا «كازتسينك», ٷلبٸ مەتاللۋرگييالىق زاۋىتتارىنا, بالىق شارۋاشىلىعى مەكەمەلەرٸنە بارۋدى جوسپارلاپ وتىر.
