QR Ekologiia, geologiia jáne tabiǵi resýrstar ministri Maǵzum Myrzaǵaliev Mańǵystaý oblysyndaǵy qýańshylyq máselesi jóninde pikir bildirdi, dep habarlaidy QazAqparat.
«Jalpy, qazir klimattyq ózgerister baiqalýda. Ony bárimiz kórip te júrmiz. Negizi elimizdiń sý balansyn qarasaq, 90-10 tekshe kilometrdi quraidy, sonyń 50 paiyzǵa jýyǵy syrttan keledi. Ortalyq Aziia bar, Resei bar, Qytai bar. Sondyqtan biz syrttaǵy kórshilerimizge táýeldimiz. Jalpy Mańǵystaý oblysynyń sý tapshylyǵy burynnan bar, jasyryn emes, shóleit dala. Sondyqtan ondai jaǵdailar baiqalady», - dedi M. Myrzaǵaliev «Kerýen» saýda ortalyǵynda bótelkelerdi qaita óńdeýge qabyldaityn «Fandobox ecoplatform» avtomatynyń tanystyrylymynda.
Onyń aitýynsha, qazirgi ýaqytta ekologter osyndai máselelerdi zerttep jatyr.
«Jalpy, sýdyń yqtimal jetispeýshiligi máseleleri, árine, týyndap jatty. Biz jasai alatyn eń mańyzdy nárse – sýdy tutynýdy azaitý boiynsha jumys isteý. Óitkeni klimattyq ózgerister júrip jatyr, olardy toqtatý múmkin emes. Jai ǵana olardyń teris áserin azaitýǵa bolady», - deidi Ekologiia ministri.
Aita keteiik, sońǵy jyldary Mańǵystaý oblysynda qurǵaqshylyq kúsheiip, bul sharýa qojalyqtaryna qatty áser etip jatyr. Jaýyn-shashynyń bolmaýy, tasymaldanatyn azyqtyń jetispeýi, aimaqtaǵy aptap ystyq malǵa kútim jasaýǵa keri áserin tigizip otyr.
