QR Ekologiia, geologiia jáne tabiǵi resrýstar ministri Maǵzum Myrzaǵaliev qatty turmystyq qaldyqtardy qaita óńdeýdiń josparymen bólisti, dep habarlaidy QazAqparat.
«Eldegi iri problema qatty turmystyq qaldyqtardy qaita óńdeýdiń tómendigi men olardy bólek jinaý ári suryptaý boiynsha tiisti infraqurylymnyń bolmaýyna bailanysty. Sondyqtan jańa Ekokodekstiń baǵyttarynyń biri - ol «Óndiris jáne tutyný qaldyqtaryn basqarýdy jetildirý» bolyp otyr. Qazirgi ýaqytta elimizdiń 3,5 myń poligonynda
120 mln tonnadan astam turmystyq qatty qaldyqtar jinaqtalǵan jáne jyl saiyn 5 mln tonnadan astam turmystyq qaldyqtar qalyptasady. Salystyratyn bolsaq, kólemi boiynsha 42 fýtbol alańyna teń», - dedi ministr Májiliste jańa Ekologiialyq kodeks jobasyn tanystyra otyryp.
Onyń sózine qaraǵanda, 2016 jyldan bastap turmystyq qaldyqtardy óńdeý
2,6 paiyzdan 14,9 paiyzǵa deiin óskeni baiqalady. Alaida bul kórsetkish jetkiliksiz.
«Túzilgen turmystyq qatty qaldyqtardyń kólemin qysqartý úshin «Waste to Energy» tetigin engizý usynylady. Osy oraida qaldyqtardy jaǵý eskerilgen, iaǵni budan elektr energiiasyn ala otyryp, ony jelige taratý qarastyrylyp otyr. Bul tetik Eýropada ózin jaqsy kórsetti», - dep túsindirdi Myrzaǵaliev.
Onyń aitýynsha, «Waste to Energy» tetigin engizýdiń arqasynda qoqys óńdeý jáne jeke investorlardyń qarajatyn tartý máselesi sheshiletin bolady.
«Bul 2025 jylǵa deiin qaldyqtar kólemin 30 paiyzǵa qysqartýǵa jáne 180 mlrd teńgeden astam investitsiia tartýǵa múmkindik beredi. Mysaly, Eýropa elderindegi 150-ge jýyq zaýyt osyndai mehanizm boiynsha jumys isteidi», - dedi vedomstvo basshysy.
Sóz sońynda ol eýropalyq direktivalarǵa uqsas, shyǵaryndylarǵa qoiylatyn talaptardy saqtaý boiynsha qatań shekteýlerdi engizý josparlanýda.
