Ekologiia, geologiia jáne tabiǵi resýrstar vitse-ministri Ahmetjan Pirimqulov Ekologiia kodeksi boiynsha óndiriske jańa tehnologiialardy engizýde kásiporyndarǵa jetkilikti ýaqyt berilip otyrǵanyn málim etti, dep habarlaidy QazAqparat.
«Biz daiyndaǵan Ekologiia kodeksiniń jobasy Májiliske barmai turyp, taý-ken óndirisi kásiporyndary qaýymdastyǵynyń, «Kazenergy» munai-gaz jáne energetika kesheniniń, «Atameken» ulttyq kásipkerler palatasy men biznestiń ózge de ókilderiniń maquldaýynan ótken. Biz reformany keiinge qaldyratyndai eshqandai syltaý joq dep oilaimyz. Óndiristiń ekologiializatsiiasyna jyldar boiy investitsiia salyp kelmei, endi karantinniń saldaryn alǵa tartýdyń qajeti joq», - dedi Ahmetjan Pirimqulov OKQ-da onlain rejimde ótken baspasóz máslihatynda.
Vitse-ministr óz sózinde halyq pen ónerkásip ókilderin alańdatyp otyrǵan negizgi máselelerge toqtaldy.
«Birinshiden, óndiristi ekologiializatsiialaý máselesi týraly aitaiyn. Ekologiialyq kodeks barshaǵa ashy ári jańa tehnologiialarǵa qol jetkizýdi kózdeidi. Bul normany engizgen kezde jańa tehnologiialar óndiristik kásiporyndarǵa belgili bir shyǵyn keltiretinin bildik. Alaida onsyz bolmaitynyn túsinemiz. Qazirgi tańda jańa tehnologiialar – Temirtaý, Óskemen, Balqash, Qaraǵandy sekildi qalalarda qorshaǵan ortanyń sapasyn qorǵaýdyń birden-bir joly. Bul mehanizm 2025 jyldan bastap engizile bastaidy. Aldymen barlyq emissiianyń 70 paiyzyn shyǵaryp otyrǵan Qazaqstandaǵy iri 50 kásiporyndy qamtidy», - dedi ol.
Ahmetjan Pirimqulov jańa tehnologiialardy engizgen kásiporyndar ekologiialyq tólemderdiń keibirinen bosatylyp, tiisinshe olarǵa salynatyn ekologiialyq somalardyń mólsheri óspeidi. Únemdelgen aqshany kásiporyndar óz óndirisin jańartýǵa jumsai alady. Bul rette Ahmetjan Pirimqulov Ekologiia, geologiia jáne tabiǵi resýrstar ministrligi kásiporyndarǵa edáýir jetkilikti ýaqyt berip otyrǵandyǵyn aitty.
«Ekologiia kodeksiniń jobasynda jańa tehnologiialardy engizýden bas tarqan kásiporyndardy jabý týraly norma joq. Bizde tek emissiia úshin tólemdi kezeń-kezeńimen kóterý jospary bar», - dedi ol.
