Elimizde qorshaǵan ortany qorǵaý maqsatynda «lastaýshy tóleidi jáne túzetedi» qaǵidaty engiziledi. Bul týraly QR Ádilet ministriniń orynbasary Aqerke Ahmetova málim etti, dep habarlaidy QazAqparat.
«2021 jylǵy 2 qańtarda jańa Ekologiialyq kodeks qabyldandy, ol boiynsha «lastaýshy tóleidi jáne túzetedi» qaǵidatyn iske asyrý kózdelgen. Sol sekildi ekologiialyq zańnama men talaptardy buzǵany úshin jaýapkershilikti qatańdatý qarastyrylǵan. Túziletin qaldyqtardyń kólemin qysqartý maqsatynda «Waste to Energy» qaldyqtardy energetikalyq kádege jaratý tetigin engizý jónindegi zań qabyldandy. Qoqys jaǵatyn zaýyttar salý úshin Nur-Sultan, Aqtóbe, Almaty, Shymkent, Qaraǵandy jáne Óskemen qalalary anyqtaldy», - dedi A.Ahmetova OKQ-de ótken baspasóz máslihatynda.
Odan bólek, vitse-ministr elimizdegi azamattardyń beibit jiyndarǵa qatysýy jáne erkin pikir bildirý quqyqtary týraly sóz qozǵady.
«2020 jylǵy maýsymda «Qazaqstan Respýblikasynda beibit jinalystardy uiymdastyrý jáne ótkizý tártibi týraly» jańa zań kúshine endi. Zań beibit jinalystardy uiymdastyrý jáne ótkizý tártibin ózgertedi jáne olardy ótkizýge ruqsat alý rásimin jeńildetedi. Qylmystyq kodekstiń «Jala jabý» 130 baby qylmyssyzdandyryldy jáne «Áleýmettik, ulttyq, rýlyq, násildik, tektik-toptyq nemese dini alaýyzdyqty týdyrý» 174-baby izgilendirildi», - deidi ol.
