Foto: instagram.com/ekibastuz_akimdigi
Jylý qyzmetkerleri ekibastuzdyqtardyń elektr energiiasy úshin ótemaqy retinde 240 million teńge tóleidi, - dep habarlaidy Massaget.kz portaly.
"OAEK" AQ basqarma tóraǵasy Baǵdat Oraldyń aitýynsha, qarajat azamattardyń jeke shotyna aýdarylady. Qazir jylýmen qamtý mekemesi men elektr energetikasy salasy arasynda tiis kelisimge qol qoiyldy.
"Ekibastuzdyń barlyq jeke tulǵasynyń ai saiynǵy tutyný shyǵynyn kórdik. Tutynýshylardyń 48 172 jeke shoty bar. Qalypty rejimde olar shamamen 220 million teńge somaǵa elektr energiiasyn tutynady. Qolda bar tutyný normalaryn negizge ala otyryp, biz "Ekibastuzenergo" JShS-na 240 million teńge aýdardyq, olar tutynýshylardyń barlyq derbes shoty boiynsha bólinedi", - dedi Baǵdat Oral brifingte.
Sondai-aq ol qalada jylý júiesindegi apattan zardap shekken páterlerdi jóndeý jumystary jalǵasyp jatqanyn aitty.
"Búginde biz ómir súrýge jaǵdai jasaý úshin eń kóp zardap shekken 52 páterge jóndeý jumystaryn júrgizip jatyrmyz. Turǵyn úidiń jartysynan astamy jóndeldi. Birlesken komissiia usynǵan tizimnen aqaýy bar páterlerdi tez arada jinap jatyrmyz. Jóndeý brigadalary qajet materialdarmen qamtamasyz etilgen", - dedi ol.
Ekibastuz ákimdiginiń málimetinshe, barlyǵy 424 páter jóndeýdi qajet etedi, onyń ishinde 338 páterge ortasha jóndeý qajet.
Sondai-aq, jylý jelilerindegi apat saldarynan jaramsyz bolyp qalǵany rastalǵan jaǵdaida, jylýmen jumys isteitinder turmystyq tehnika men búlingen jihazdyń shyǵynyn óteýge ýáde berip otyr.
"Árine, biz ákimdikpen komissiialyq negizde búlingen qural-jabdyqtar men jihazdarǵa ótemaqy tóleý máselesin talqylap jatyrmyz. Biz jóndeý jumystaryn júrgizip jatqan páterlerde qubyrlar jarylǵan apatty jaǵdai kezinde búlingen jihazdar men terezelerdi ishinara ótep jatyrmyz. Basqa páterlerge qatysty turǵyndardan barlyq túbirtekti saqtaýdy suraimyz. Eger olar birnárseni, sonymen qatar, búlingen qural-jabdyqtardy ózderi aýystyryp qoiǵan bolsa, biz barlyq túsken ótinishti komissiialyq negizde qaraimyz. Bul shyn máninde TJ, úidegi qubyrlardyń jarylýy, jylytý júiesiniń buzylýy sebepteri boiynsha rastalsa, árine, óteimiz", - dedi "OAEK" AQ basqarma tóraǵasy.
Qalany jylýmen qamtý máselesine kelsek, Ekibastuz ákimi Aian Beisekinniń málimetine súiensek, qazir barlyq kópqabatty turǵyn úi jylýmen qamtylǵan. Degenmen, birqatar kópqabatty úide jylýmen qamtý máselesi áli de bar.
"30-ǵa jýyq úi, qalai bolǵanda da, áli de tómen parametrlerde tur, biz olar boiynsha jeke jumys júrgizip jatyrmyz. Biraq basty sebep, stantsiianyń ózinde, ókinishke qarai, kún saiyn keibir qazandyq qondyrǵylarynda aqaý shyǵyp jatyr. Birnárse isten shyqsa, ekinshisi qosylyp jatyr, sóitip birizdi etip jatyrmyz, iaǵni bizdiń aldymyzda stantsiianyń jumysyn tolyq turaqtandyrý mindeti tur. Qazir ol tórt qazandyqta jumys isteidi. Kelesi úsh saǵattan keiin taǵy eki qazandyqty iske qosamyz, kún aiaǵyna deiin parametrler sáikes kelýi kerek", - dedi Beisekin.
