Ekibastuzdaǵy barlyq zardap shekken úige jylý berildi. Bul týraly jedel shtab basshysy - Premer-ministrdiń birinshi orynbasary Roman Skliar málimdedi, - dep habarlaidy "Ult aqparat" Úkimettiń baspasóz qyzmetine silteme jasap.
"Jelilik sýdyń parametrleri: qysymy - 8,8 kg/sm2, túzý baǵytta - 83 gradýs, túzý jáne keri baǵytta 56 gradýsty quraidy.
Energiia kózi shtattyq rejimde jumys istep tur. Ekibastuz JEO qaladaǵy jylýmen qamtýdy qalypqa keltirý úshin barlyq kúshterdi jumyldyryp jatyr. Ókinishke orai, sońǵy kúnderi oryn alǵan oqiǵalardyń nátijesinde bolǵan gidravlikalyq rejimniń teńgerimsizdigi, sonyń ishinde tutynýshylar men PIK-terdiń jylý tasymaldaǵyshtaǵy sýdy ruqsatsyz aǵyzýy bul jumysty qiyndatty.
Barlyq turǵyndarǵa shydamdylyq tanytqandary úshin alǵys bildiremiz jáne aldaǵy 2-3 kúnde birlesken kúsh-jigerdiń arqasynda jylýmen qamtý tolyǵymen qalpyna keledi dep oilaimyz", - delingen habarlamada.
Eske salaiyq, 27 qarashada túnde, saǵat 01:20 shamasynda, Ekibastuz JEO-da qazandyq isten shyǵyp, on minýttan keiin taǵy úsheýi toqtaǵan bolatyn. Sol ýaqyttan beri qalada turǵyndar jylý joq ekenin aityp, shaǵymdana bastaǵan. Qalada tótenshe jaǵdai jariialandy. Tótenshe jaǵdai jóndeý-qalpyna keltirý jumystary aiaqtalǵanǵa deiin kúshinde bolady. Pavlodar oblysynyń prokýratýrasy Ekibastuzdaǵy tótenshe jaǵdai boiynsha qylmystyq is qozǵady.
Aita keteiik, Ekibastuzda barlyǵy 689 kópqabatty úi bar. Jóndeý-qalpyna keltirý jumystaryna 851 adam jumyldyrylǵan.
