Foto: Rústem Syzdyqov /lifepvl.kz
Ekibastuzda radiatory jarylǵan úide erli-zaiypty qaza bolǵannan keiin kórshileri jylýmen qamtamasyz etetin kompaniiany "áreketsizdigi úshin" kinálady. Kompaniia aiypty joqqa shyǵarady, dep habarlaidy Azattyq radiosy.
63 jastaǵy Aleksandr Sergeenko men onyń áieli 57 jastaǵy Anna osy aptada ózderi turyp jatqan jeke úide óli kúide tabylǵan. Kórshileri Azatyqqa ótken aida erli-zaiyptynyń ortalyq jylý júiesine qosylǵan batareialarynan sý aqqanyn, olar "Ekibastuzjylýenergiia" kompaniiasynyń apat qyzmetine habarlassa da, másele sol kúii sheshilmegenin aitty.
"Ania Sergeenko "Sultan, úide sý aǵyp jatyr" dep keldi. Kórshimiz ǵoi dep kómekteskim keldi, sebebi kúieýi – birinshi top múgedegi. Kózi nashar kóredi. Qarap kórdim. Batareialar túiisken jerden sý aǵyp jatyr eken. Jóndeý úshin áýeli kósheden sýdy jabý kerek boldy. Biz oǵan óz betimizshe tiise almaimyz" - deidi Sergeenkolardyń úiine qarama-qarsy turǵan dúken iesi Sultan Masadilov.
Onyń sózinshe, ol statsionarlyq ne mobildi telefony joq Anna Sergeenkoǵa jylý elektr ortalyǵynyń apat qyzmetine habarlasýǵa keńes bergen. Al ol jaqta áielden keńsege habarlasýdy ótingen.
Marqumdardyń taǵy bir kórshisi Nikolai Artiýhov Sergeenkony keńsege aparǵanyn, ol jaqta oǵan "ertesinde baramyz" dep ýáde bergenin, biraq sol kúii eshkim kelmegenin aitty.
Masadilovtiń aitýynsha, Aleksandr Sergeenko "Ekibastuzjylýenergiia" kompaniiasyna birneshe ret habarlasyp, kómek suraǵan.
"Biz habarlastyq, olar taǵy ýáde berdi, biraq kelgen joq. Sosyn taǵy habarlastym. Olar qysym tómen bolǵandyqtan, ystyq sýdy toqtata almaitynyn, eger toqtatsa, barlyq batareia sýyp ketetinin aitty. "Endi olar ne isteýi kerek, úiden ystyq sý aǵa bere me?" dep suradym. Olar ruqsat bergen soń jóndep beretinin aitty. Osylaisha úsh ret habarlastym, sol kúii kelgen joq" dedi Sultan Masadilov.
Kórshileriniń aitýynsha, Aleksandr men Anna Sergeenkolardyń úiin sý basyp jatqanyn 13 aqpanda ózin turǵyn úi-kommýnaldyq sharýashylyq qyzmetkerimin dep tanystyrǵan er adam kórip, politsiiaǵa habarlasqan.
Politsiia qyzmetkerleriniń aitýynsha, qutqarýshylar men kommýnaldyq qyzmet jumysshylary oqiǵa ornyna barǵan kezde 1959 jyly týǵan er adam men 1965 jyly týǵan áiel adam óli kúide tabylǵan. Mamandar zalda symdary búlingen elektr jylytqysh turǵanyn kórgen.
Ertesinde júrgizilgen sot-meditsina zertteýiniń aldyn ala nátijesi eki adam "tok soqqannan ólgenin" kórsetken.
"Ekibastuzjylýenergiia" kompaniiasynyń resmi jaýabynda erli-zaiyptylar "mekemege bir ret qana habarlasqany" jazylǵan. Mekeme ókilderiniń aitýynsha, 31 qańtarda erli-zaiypty batareiany jóndetý úshin jylý júiesin óshirý týraly ótinish bergen. Ertesinde mamandar mekenjaiǵa barǵan kezde ystyq sýdy óshire almaǵan, sebebi "ornatylýy kerek armatýra tiisti standartqa sáikes kelmegen". Mekeme ókilderi "Sergeenkolar jylý jelisine qaita habarlaspaǵannan keiin mamandar atalǵan mekenjaiǵa barǵan joq" dep jazǵan.
Erli-zaiyptyny 15 aqpanda Aleksandr Sergeenkonyń uly jerlegen. Ol jýrnalisterdiń suraqtaryna jaýap berýden bas tartty.
Byltyr jyldyń aiaǵynda Ekibastuz jylý elektr ortalyǵynda iri apat bolyp, júzdegen úi qaqaǵan sýyqta jylýsyz qaldy. Aýa temperatýrasy 30 gradýsqa deiin tómendedi. Qalada tótenshe jaǵdai jariialandy. Sodan beri kópqabatty turǵyn úiler men jeke úilerge shektelgen parametrmen jylý berilip jatyr.
Apattan keiin Qazaqstan biligi eldegi jylý júieleriniń 70-90 paiyzǵa jýyǵy tozǵanyn málimdegen.
Copyright (c) 2013. RFE/RL, Inc. Reprinted with the permission of Radio Free Europe/Radio Liberty, 1201 Connecticut Ave., N.W. Washington DC 20036.
