Ekibastuz qalasynda turǵyn úidegi órtti óshirgen órt sóndirýshilerge joǵarǵy qabattaǵy páterde bala qalyp qoiǵany týraly aqparat kelip túsken, dep habarlaidy QazAqparat.
«Ekibastuz qalasyndaǵy órt týraly habarlama №2 mamandandyrylǵan órt sóndirý bóliminiń «101» nómirine 8 jeltoqsan kúngi saǵat 15:34-te kelip túsken. Órt Júsip kóshesi, 71-shi úidiń úshinshi kireberisi, tórtinshi qabatynan shyqty», - dep baiandady tilshilerge Pavlodar oblystyq Tótenshe jaǵdailar departamentiniń baspasóz qyzmetinen.
Oqiǵa ornyna bes minýtta kelip jetken órt sóndirýshiler úsh bólmeli páterdegi balkon terezeleriniń aǵash jaqtaýlary, al jatyn bólmede – jihaz órtengenin anyqtady.
Jalyn 6 sharshy metr aýmaqty sharpyǵan. Tóńirektiń barlyǵy tútinge orandy.
5 adam órt sóndirýshiler kelgenshe úiden ózdiginen shyqty, dep atap ótti TJD-dan. Órt sóndirýshiler barlyq páterlerdi aralap shyǵyp, tútindi alastap jiberdi.
«Qutqarýshylar jalyn shyqqan páterden bir qabat joǵary ornalasqan páterde 7 jasar balanyń qalyp qoiǵany týraly aqparat kelip tústi. Balanyń anasy tútindegen páter esigin kiltpen ashqan soń, aǵa órt sóndirýshi Efim Kýznetsov onyń ishinen 2014 jylǵy balany syrtqa alyp shyqty», - dep baiandady qutqarýshylar.
Balany tekserip shyqqan dárigerler oǵan meditsinalyq kómek qajet emes ekenine kóz jetkizdi. Jalyn 28 minýtta sóndirildi, dep qosyp ótti departamentten.
Oqiǵa ornynda Pavlodar oblystyq TJD jeke quramynyń 10 qyzmetkeri men 3 tehnika, 103, 102 qyzmetteri jáne elektr júiesi jumys istegen.
Órttiń shyǵý sebepteri men odan bolǵan shyǵyn anyqtalýda.
