Sýret: egemen.kz
Ekibastuz qalasynda kúieýin pyshaqtap óltirgen dáriger áiel 5 jylǵa bas bostandyǵynan aiyryldy. Biraq alqabiler jazany óteý merzimin keiinge shegerýge sheshim qabyldady, dep habarlaidy Sputnik Qazaqstan.
Jazany nege shegerdi?
Sotta dáriger áiel qajetti qorǵaný sheginde áreket etkenin alǵa tartyp, ózin aqtaýdy surady. Biraq alqabidiń onyń Qylmystyq kodekstiń 106-baby, 3-bóligi (Densaýlyqqa qasaqana aýyr ziian keltirý, abaisyzda jábirlenýshiniń ólimine ákep soqqan áreket) boiynsha kináli dep tanydy.
Jaza taǵaiyndaý kezinde sottalýshynyń alǵash ret qylmystyq jazaǵa tartylyp otyrǵany jáne oń minezdemesi eskerildi. Qolynda sábii de bar. Budan bólek, qaitys bolǵan kúieýiniń minez-qulqy nazarǵa alyndy. Ol alkogoldik masań kúide júkti áielin birneshe ret urǵan.
"Joǵaryda aitylǵandardy eskere otyryp, jaza taǵaiyndaý kezinde QK-niń 55-babynyń 4-bóligi qoldanylyp, A.-ǵa 5 jylǵa bas bostandyǵynan aiyrý jazasy taǵaiyndaldy", - delingen resmi habarlamada.
Sottalǵan áiel 2023 jyly týǵan balasyn tárbielep otyr. Osyǵan bailanysty úkimdi oryndaý 5 jylǵa keiinge shegerildi.
Oqiǵanyń mán-jaiy
Tergeý materialdaryna sáikes, 2023 jyly 8 mamyrda saǵat 04:55 shamasynda Ekibastuz qalasyndaǵy 25 bóbekjaidyń kire berisinde er adam júktiliktiń sońǵy kezeńinde júrgen áielin moiynynan jáne qolynan urǵan. Osydan keiin áiel ketip bara jatqan kúieýiniń arqasyna pyshaq suqqan. Er adamnyń sol jaq ókpesiniń joǵarǵy bóligi zaqymdanǵan. Ol alǵan jaraqatynan qaitys boldy.
Bas kezinde Ekibastuz qalalyq politsiia basqarmasy Qylmystyq kodekstiń 99-baby, 1-bóligi (Adam óltirý) boiynsha tergeýdi bastaǵan. Sol kezde jaýapqa tartylǵan dáriger áiel Prezidentke beineúndeý joldap, turmystyq zorlyq-zombylyqtyń qurbany bolǵanyn málimdedi. Onyń aitýynsha, qaitys bolǵan kúieýimen 4,5 ai boiy nekede turǵan. Osy ýaqyttyń ishinde er adam ony talai ret urǵan. Politsiiaǵa da habar berilgen. Biraq úiine qaityp kelgen kúieýi alǵan betinen qaitpaǵan.
"Týra sondai bir oqiǵadan keiin ol pyshaq ala júgirdi. Men pyshaqty alyp qoidym da, qasha jóneldim. Biraq ol taǵy maǵan judyryq jumsady. Sol kezde men qoryqqanymnan affekt jaǵdaiynda pyshaqpen bir urdym. Ókinishke qarai, ol qaitys boldy", - deidi áiel.
Sotta alqabiler adam óltirý babyn abaisyzda jábirlenýshiniń ólimine ákep soqqan densaýlyqqa qasaqana aýyr ziian keltirý áreketine aýystyrdy.
Úkim zańdy kúshine engen joq.
