Arqa bulshyqet atrofiiasy dertine shaldyqqan Batys Qazaqstan oblysy Aqsai qalasynyń eki jasar turǵyny Emir Shahmarovqa álemdegi eń qymbat sanalatyn «Zolgensma» dárisi egildi. Muny balanyń anasy Sabina Dáýletqalieva habarlady.
Buǵan deiin eldegi barlyq aqparat quraly Batys Qazaqstan oblysy turǵyndarynyń búldirshin emine aqsha jinai bastaǵany týraly habarlap júrgen edi. Nátijesinde úsh ai ishinde Emirge qajet 2,3 millon dollar (milliard teńgege jýyq) qarjy jinaldy.
Bala úshin ómirlik mańyzy bar, Qazaqstanda tirkelmegen bul dárini oǵan Máskeýdiń bala densaýlyǵy ǵylymi ortalyǵynda saldy.
— Osydan eki saǵat buryn ǵana dári ekti. Bir saǵattai infýziia jasady. Emir bul ýaqytta uiyqtap jatty, esh mazasyzdanbady. Biz jansaqtaý palatasynda otyrdyq, eki dáriger, medbikeler jáne reanimatolog qasymyzda boldy, — dedi Sabina Dáýletqalieva 4 maýsymda Azattyqqa suhbatynda.
Endi Emir birneshe tekserýden ótip, analiz tapsyrýy kerek. Anasynyń aitýynsha, bala osy ǵylymi ortalyqta dárigerler baqylaýynda bolady. Aýrýhanadan qashan shyǵatyny belgisiz.
«Zolgensma» — arqa bulshyqet atrofiiasy dertimen kúresý úshin álemde oilap tabylǵan úsh preparattyń biri. Ol eki jasqa deiingi balaǵa salynǵanda jaqsy nátije kórsetip júr. Emir mamyr aiynda ekige toldy.
Arqa bulshyqet atrofiiasy — genetikalyq aýrý, onyń kesirinen adamnyń barlyq bulshyqeti semip, saldarynan naýqas ólip ketýi múmkin. Bul dertten emdeitin preparattyń birde-biri Qazaqstanda áli resmi tirkeýden ótpegen. Densaýlyq saqtaý ministrligi elde onymen qansha adam aýyratynyn naqty aitpaidy.
