QR Densaýlyq saqtaý vitse-ministri Aleksei Tsoi elimizdegi dári-dármekterdiń baǵasyn retteý úshin qandai mehanizmder iske qosylatyndyǵy týraly aitty, dep habarlaidy QazAqparat tilshisi.
«Búgin biz dári-dármekterdiń baǵasyn retteý syzbasyn tanystyrdyq. Buryn kepildendirilgen mólsher aiasynda ǵana, iaǵni memlekettik satyp alý arqyly baǵany rettep otyrsaq, kóterme segmentte baǵany retteitindei quziretimiz bolmaǵan edi. Ózderińiz biletindei, Memleket basshysy kóterme segmentte baǵany retteýdi júktegen. Biz baǵany retteýdiń modelin ázirledik», - deidi Aleksei Tsoi «SK Farmatsiia» JShS-da ótken dóńgelek ústel barysynda.
Onyń aitýynsha, dári-dármekti tasymaldaýshylardyń kóbi qymbat baǵamen satyp jatqan joq. Degenmen, saýdanyń keibir sýbektteri uiatty ysyryp qoiyp, baǵany birneshe esege kóbeite satyp jatqan kórinedi.
«Shamamen tasymaldaýshylardyń 70 paiyzy - jaýapty ári ádil dese bolady. Kóp jaǵdaida olar durys jumys júrgizip, baǵany kótermeidi. Biraq, naryqtyń «tentekteri» de bar. Mine, biz ázirlep jatqan erejeler solardy tyiýdy kózdeidi. Baǵalardyń asyrýǵa bolmaityn belgili bir mólsheri belgilenedi. Osylaisha, dári-dármekterdiń baǵasyn 2-3 esege deiin qymbattatý jaǵdailary tyiylady. Máselen, dárihanalardaǵy baǵalardyń ala-qulalyǵyn ózińiz de kóre alasyz. Bizdiń mindet - baǵalardyń aýytqýy belgili bir bekitilgen dáliz ishinde bolǵanyn qamtý», - deidi Aleksei Tsoi.
Vitse-ministr bul tártiptiń kelesi jyldyń 1 qańtarynan bastap engizý kózdelip otyrǵanyn atap ótti.
«Turǵydar baǵa aiyrmashylyǵyn eshqai jerde salystyra almaidy - baǵalardyń reestri joq. Aldaǵy ýaqytta árbir adam dári-dármektiń baǵasyn bilip otyratyn sait jumys isteitin bolady. Saýdadaǵy ataýy boiynsha baǵany ózińiz tekserip otyrasyz», - deidi vitse-ministr.
Aita ketsek, Qazaqstanda dári-dármek baǵalarynyń ala-qulalyǵyn retteitin zań jobasy ázirlenip jatqanyn budan buryn «SK-Farmatsiia» JShS basqarma tóraǵasynyń mindetin atqarýshy Berik Shárip te aitqan bolatyn.
