Almatynyń ákimi Baqytjan Saǵyntaev qylmyskerdiń ákesine qalai oq atqanyn eske aldy, dep habarlaidy Sputnik Qazaqstan.
"1973 jyly men on jasta edim. Aýylda turamyz. Ákem ekeýimiz qaladan keldik, ol kezde Jambyl (qazirgi Taraz - Sputnik) dep atalatyn. Tún boldy. Baǵanalarda shamdar janyp turǵany áli esimde. Aýlaǵa kirgen joqpyz. Qaqpanyń aldyna toqtadyq. Sol kezde "GAZ-69"-ben júrdik. Ákem aldynda, al men artynda otyrdym. Ekeýmiz birge shyqtyq", - dedi Saǵyntaev Armanjan Baitasovtyń Youtube-arnasyna bergen suhbatynda.
Al qarý ustaǵan qylmysker sharbaqtyń artynda tyǵylyp turǵan. Artynan sot kezinde ol jaqyn jerden atpaýǵa sheshim qabyldaǵanyn aitty. Sebebi Ábdir Saǵyntaevtyń janynda kishkentai uly boldy. Balany aiaǵan.
Baqytjan ákesimen birge úige kirip, keshki asyn ishedi. Al jatardyń aldynda ákesi daladaǵy dárethanaǵa barmaq bolyp syrtqa shyqqan. Ony kútip otyrǵan qylmysker dárethanaǵa ótip ketkenin baiqamasa da, qaityp kele jatqanyn kórgen.
"Ol jerde 50 metrdei boldy. Ol shúrippeni eki ret basty. Ákem jaraqat aldy. Jaqyn jerden atqanda óltirip tastaityn edi", - deidi ákim.
Ábdir Saǵyntaev aman qalyp, oǵan ota jasalǵan. Biraq 13 jyldan keiin sońǵy jáne Uly Otan soǵysyndaǵy jaraqattar syr berip, 64 jasynda kóz jumdy.
"Men úlken ómirge aiaq basyp jatqan ýaqytta ákemniń aqyl-keńesterine muqtaj boldym. Ishtei izdep otyratynmyn. Al sońǵy oqiǵa kezinde ákemniń eshqaida ketpegenin túsindim. Onyń árýaǵy meni qutqardy. Meni jelep-jebep júrdi. Ákeme alǵysym sheksiz", - dep atap kórsetti Saǵyntaev.
Almatydaǵy jappai tártipsizdikter kezinde qala ákiminiń korteji oqtyń astynda qalǵan. Almaty arnasynyń kólik júrgizýshisi qaitys boldy. Ákimniń jeke júrgizýshisi de jaraqat aldy. Budan bólek, sport jáne din basqarmalarynyń basshylaryna oq tigen.
