Klinikalyq zertteýdiń I/II fazalarynyń aralyq esepteriniń qorytyndysy COVID-19 virýsyna qarsy otandyq QazCovid-in vaktsinasynyń qaýipsizdigi men immýndylyǵyn kórsetti. Bul týraly QR Densaýlyq saqtaý ministrliginen málim etti, dep habarlaidy "Ult aqparat".
Qazirgi kezde QR BǴM Ǵylym komitetiniń Biologiialyq qaýipsizdik máseleleri Ulttyq ǵylymi-zertteý institýtynyń ǵalymdary shyǵarǵan COVID-19 virýsyna qarsy inaktivtelgen QazCovid-in vaktsinasy klinikalyq zertteýdiń III fazasyna kirip otyr.
Zertteýge úsh myń adam qatysýda.
QazCovid-in inaktivtelgen vaktsinanyń negizine inaktivtelgen virýs jáne ziiansyz adiývant salynǵan. Sondyqtan preparat vaktsinalyq preparattardyń ózge tipterimen salystyrǵanda kepildi túrde qaýipsiz bolyp tabylady.
QazCovid-in vaktsinasy janýarlarǵa (aq tyshqan, egeýquiryq, siriialyq alaqorjyn, qoian, kúzen jáne maimyl) klinikaǵa deiingi zertteýden ótken. Klinikalyq zertteýdiń birinshi fazasy 18-50 jas aralyǵyndaǵy 44 eriktige júrgizilgen, al zertteýdiń ekinshi fazasynan 18 jáne odan eresek jastaǵy 200 erikti ótti.
«Klinikalyq zertteýdiń I/II fazalarynyń aralyq esepteriniń qorytyndysy COVID-19 virýsyna qarsy otandyq QazCovid-in vaktsinasynyń qaýipsizdigi men immýndylyǵyn kórsetti. QazCovid-In otandyq vaktsinasy boiynsha klinikalyq zertteýdiń I jáne II fazalarynyń aralyq esebi alyndy, onyń qorytyndysyna sáikes bulshyqet ishine bir jáne eki ret engizý kezinde jaqsy tóze alýshylyq pen qaýipsizdik atap ótilgen. Vaktsinanyń SARS-CoV-2 virýsyna qatysty joǵary immýnogendi belsendiligi anyqtalǵan», - dep atap ótti QR Densaýlyq saqtaý ministrliginen.
Búginde klinikalyq zertteýdiń III fazasy júrgizilýde, oǵan túrli jastaǵy 3 myń erikti qatysýda. Klinikalyq zertteýler Almaty jáne Taraz qalalarynyń klinikalyq bazalarynda ótkizilip jatyr. QR BǴM «Biologiialyq qaýipsizdik problemalarynyń ǵylymi-zertteý institýty» RMK QazCovid-In vaktsinasyna 2020 jyldyń 15 jeltoqsannan bastap ýaqytsha tirkeý kýáligin berdi.
Ónerkásip seriialarynyń óndirisi aǵymdaǵy jyldyń sáýir aiynyń sońyna josparlandy.
