Foto: Videodan skrinshot
Astananyń eki turǵyny esirtki quraldaryn taratqany úshin 8 jáne 18 jylǵa deiin bas bostandyǵynan aiyryldy, - dep habarlaidy «Ult aqparat» QMA baspasóz qyzmetine silteme jasap.
QMA-nyń elordalyq departamenti AQSh-tan esirtki jáne psihotroptyq zattardy halyq tutynatyn taýarlary bar poshta sálemdemeleri túrinde asa iri mólsherde jetkizý deregin áshkereledi.
Qyzmettik-izdestirý itin qoldana otyryp, tekserý júrgizý kezinde kedendik baqylaý aimaǵyndaǵy ýaqytsha saqtaý qoimasynda jalpy salmaǵy shamamen 1 keli bolatyn "gashish" esirtki zaty tabylyp, tárkilendi.
Sonymen qatar, sotaldy tergeý barysynda júrgizilgen monitoring nátijeleri "Qazposhta" AQ qalalyq filialdarynyń birinde sol alýshylardyń atyna taǵy bir sálemdeme kelgenin kórsetti.
"Sálemdemede jalpy salmaǵy 7 gramnan asatyn kúshti psihotropty zat – tetragidrokannabinol jáne onyń izomerleri tabyldy. Aiyptalýshylardyń biriniń páterin tintý kezinde esirtki quraldary, sondai-aq oraýysh materialdar men tarazy tabyldy. Sot sheshimimen istiń eki qatysýshysy kináli dep tanylyp, ortasha qaýipsizdik koloniiasynda jazasyn ótei otyryp, 8 jáne 18 jyl merzimge bas bostandyǵynan aiyryldy", - delingen habarlamada.
Jalpy, jyl basynan beri esirtki kontrabandasy jáne zańsyz ainalymy faktileri boiynsha 116 qylmystyq is tirkelgen. 57,3 keli esirtki tárkilengen. Sonymen qatar, 1,7 keli psihotroptyq zattar, anabolikter (ýly zat) – 206 myń dana jáne "Tropikamid" kóz tamshylary – 1 680 dana tárkilendi.
