2019-2020 jyly qysqy kezeń jol salasynyń mamandary úshin jabysqaq qardyń saldarynan «Óskemen – Zyrianov – Rahmanov bulaqtary» avtomobil jolynyń jabylýynan bastaldy.
QR Indýstriia jáne infraqurylymdyq damý ministrliginiń málimetteri boiynsha, qazan jáne jeltoqsan ailarynyń aralyǵynda respýblikalyq mańyzǵa ie joldarda qozǵalysqa 235 ret shekteý qoiylǵan.
Osy rette qazan jáne jeltoqsan ailarynyń aralyǵynda Shyǵys Qazaqstan oblysynyń joldaryndaǵy qozǵalys 72 ret shektelgen bolatyn.
Joldardyń jabylýynyń jiiligi boiynsha el óńirleri arasyndaǵy ekinshi oryn Aqmola oblysyna tiesili. Munda joldardaǵy qozǵalysqa 49 ret shekteý qoiylypty.
Joldar kóbine joldaǵy jaǵdaidy kórýge kedergi keltiretin, jol-kólik oqiǵalarynyń týyndaýyna qaýip tóndiretin tuman, boran, jabysqaq qar, jańbyr, aýa temperatýrasynyń tómendeýi siiaqty aýa raiynyń qolaisyz jaǵdailary saldarynan jabylady.
Qarashada Shyǵys Qazaqstan oblysynda aýa temperatýrasynyń -34 gradýsqa deiin tómendeýi saldarynan jolshylar tasjoldardy 15 ret jabýǵa májbúr boldy.
Óńirde 12 jylytý pýnktiniń jumys isteitindigin aita ketý kerek. Qazaqstanda mundai pýnktterdiń jalpy sany 124 birlikti quraidy. Budan bólek, biyl jol salasynyń mamandary kóktaiǵaqqa qarsy joldarǵa shashylatyn qumnyń 60 myń, tuzdyń 13 myń tekshe metrin daiyndaǵan.
Aýa raiy qolaisyz kezde «Qazaqavtojol» JShS joldardy óziniń jiti baqylaýyna alady. Kásiporyn jol tehnikasynyń 1067 birligimen jabdyqtalǵan.
Qazaqstanda barlyǵy qysqy kútip ustaý sharalarymen avtomobil joldarynyń 25 myń shaqyrymy qamtylsa, onyń 21,1 myń shaqyrymy «Qazaqavtojol» JShS-niń, 3,4 myń shaqyrymy qaita qurý nysandaryndaǵy merdigerlik uiymdardyń jáne 422 shaqyrymy kúrdeli jóndeýdiń aýyspaly nysandarynyń qaramaǵynda.
Eske salaiyq, jalpy paidalanymdaǵy joldardaǵy qozǵalystyń shektelýi men jabylýyna «QazAvtoJol» UK» AQ, QR IIM Tótenshe jaǵdailar jáne Ákimshilik politsiia komitetteri jaýapty.
