2019 jyly Tokioda adam ólimimen aiaqtalǵan jol apaty úshin sottalǵan 90 jastaǵy burynǵy joǵary shendi sheneýniktiń bes jyldyq túrme jazasy juma kúni aiaqtaldy, dep habarlaidy QazAqparat Kyodo agenttigine silteme jasap.
Sot úkimi boiynsha, 2019 jylǵy 19 sáýirde Tokiodaǵy Ikebýkýro aýdanynda Kodzo Iidzýkanyń tejegishti gaz pedalimen shatastyryp alyp, baǵdarshamnyń qyzyl túsine ótip ketip, jaiaý júrginshiler ótkelinde velosipedpen kele jatqan 31 jastaǵy Maný Matsýnagý men onyń 3 jasar qyzy Rikony qaǵyp óltirgen. Oqiǵa saldarynan taǵy toǵyz adam jaraqat aldy.
Endi prokýratýra ózdiginen júre almaityn, múgedekter arbasyna tańylǵan Iidzýkanyń jasy men densaýlyq jaǵdaiyn eskere otyryp, temir tordyń ar jaǵynda ýaqyt ótkizetinin-ótkizbeitinin zertteidi.
Japoniianyń Qylmystyq is júrgizý zańy 70 jastan asqan sottalǵandarǵa, sondai-aq densaýlyǵyna eleýli ziian keltirý nemese ólim qaýpimen betpe-bet kelgenderge jazany toqtata turýǵa múmkindik beredi.
Iizýka oǵan taǵylǵan aiyp boiynsha kinásin moiyndaǵan joq. Ol kólik quralyndaǵy mehanikalyq problemaǵa bailanysty kólikti basqara almai qalǵanyn málim etken.
Alaida, sot onyń gaz pedalin tejegish dep shatastyryp, ony shamamen 10 sekýnd basyp turǵanyn, saldarynan kóliktiń jyldamdyǵy 96 km/saǵ-qa jetkenin anyqtady. Ol ólimge ákelgen jol apaty úshin kináli dep tanyldy.
Sondai-aq sot Iidzýkanyń jasyn eskere otyryp, bes jylǵa bas bostandyǵynan aiyrýǵa sheshim qabyldaǵan bolatyn.
