19 mamyrda Egipettiń Giza qalasyndaǵy piramidalar janynan ótip bara jatqan týristik avtobýs mańynda jarylys bolyp, onnan asa adam zardap shekti. Reuters agenttiginiń habarlaýynsha, japa shekkenderdiń kóbi - týrister. Jarylǵysh zat avtobýs sol mańnan ótip bara jatqanda iske qosylǵan.
AFP agenttigi derekkózderine siltep, kem degende 17 adamnyń japa shekkenin habarlady. Sky News Arabia-nyń jazýynsha, toǵyzy - Egipet, jeteýi - Ońtústik Afrika Respýblikasynyń azamattary.
Qazaqstan syrtqy ister ministrligi "jarylystan japa shekkender arasynda qazaqstandyqtar joq" dep habarlady.
Aita keteiik, byltyr jyl sońynda osy mańda - Gaza piramidalar kesheni janynda týristik avtobýs jarylyp, Vetnamnyń úsh azamaty men bir jergilikti gid qaza tapqan. 2011 jyly bolǵan jappai kóterilister men saiasi ózgeristen soń elge keletin týrister sany kúrt azaiǵan. Bul týrizmnen biraz paidaǵa kenelip otyrǵan Egipet ekonomikasyna keri áser etti.
