Máskeýdiń Ostankino soty Birinshi arna redaktory Marina Ovsiannikovaǵa "zańsyz narazylyq aktsiiasyna shaqyrǵany úshin" 30 myń rýbl kóleminde aiyppul saldy, dep habarlaidy "Azattyq".
Ovsiannikova 14 naýryzda keshke "Vremia" jańalyqtar baǵdarlamasynyń tikelei efiri bolyp jatqanda stýdiiada otyrǵan diktordyń qasyna atyp shyǵyp, "Soǵysty toqtatyńyzdar. Propagandaǵa senbeńizder. Bul jerde sizderdi aldap jatyr" degen jazýy bar plakat ustap turdy. Ol diktor sóilep jatqanda "Soǵysty toqtatyńyzdar! Soǵysqa jol joq!" dep qarsylyq ta bildirdi. "Pervyi kanal" osy jaitqa bailanysty tekseris bastaǵan, artynsha Ovsiannikovanyń ustalyp, ústinen ákimshilik is qozǵalǵan degen habar shyqty.
Sot otyrysynan "Mediazona" transliatsiia júrgizdi. Sýdia Anna Bolotnikovanyń aitýynsha, politsiia "internet monitoring kezinde" jýrnalistiń jurtty "narazylyq aktsiiasyna shaqyrǵan" videosyn tapqan. Jýrnalist taǵylǵan aiyppen kelispedi.
Aqparatqa qaraǵanda, jýrnalist Birinshi arna efirine shyqpai turyp videomálimdeme jasaǵan. Videonyń sońynda tilshi "mitingige shyǵyńyzdar" deidi. Videorolikte ol úgit-nasihatqa aralasqanyn alǵa tartyp, sol isine ókinetinin aitady.
"2014 jyly bastalǵan kezde bárimiz únsiz qaldyq. Kreml Navalnyiǵa ý bergen kezde mitingige shyqqan joqpyz. Biz antigýmandy rejimdi únsiz baqyladyq. Qazir bizden búkil álem teris ainaldy. Bizden keiin on býyn aýyssa da, myna masqaradan aryla almaidy. Biz, orys halqy, oily, aqyldymyz. Bul bassyzdyqty toqtatý tek bizdiń qolymyzdan ǵana keledi. Mitingige shyǵyńyzdar, eshteńeden qoryqpańyzdar, olar bizdiń bárimizdi otyrǵyza almaidy" dedi tilshi.
Jýrnalist 14 naýryzda aktsiiadan keiin "Ostankino" teleortalyǵynda ustalǵan. Onyń qaida ekeni uzaq ýaqyt belgisiz boldy. Memlekettik TASS agenttiginiń derekkózi naýryz basynda kúshine engen armiianyń bedeline nuqsan keltirý týraly qylmystyq bap boiynsha tergeýge deiingi tekseris júrgizip jatqanyn habarlaǵan. Ol boiynsha jýrnaliske 10 jyl túrme jazasy berilýi múmkin.
