Soltústik Qazaqstan oblysynda alaiaqtar HQKO jáne eGov qyzmetkerleri bolyp habarlasyp, turǵyndardy jańa tásilmen aldap jatyr. Osy shemaǵa sengen 44 jastaǵy turǵyn 4 mln teńgesinen aiyrylǵan, dep habarlaidy ult.kz.
SQO politsiia departamentiniń málimetinshe, qyrkúiek aiynyń alǵashqy kúnderinen bastap óńir turǵyndaryna belgisiz adamdar qońyraý shalyp, ózderin HQKO nemese eGov qyzmetkerleri retinde tanystyra bastaǵan.
Alaiaqtar azamattarǵa elektrondyq tsifrlyq qoltańbanyń (ETsQ) qoldanylý merzimi aiaqtalǵanyn aityp, ony uzartý qajet ekenin jetkizedi. Áńgime barysynda kelisimdi rastaý úshin telefon pernetaqtasynan «1» batyrmasyn, al bas tartý úshin «3» batyrmasyn basýdy suraidy.
Osydan keiin basqa adam qońyraý shalyp, azamattyń jeke kabineti buzylǵanyn jáne onyń atyna nesie rásimdelgenin aitady. Alaiaqtar máseleni sheshýdiń «jalǵyz joly» retinde taǵy bir nesie rásimdep, qarajatty «qaýipsiz shotqa» aýdarýdy usynady.
Sońǵy kúnderi politsiiaǵa osyndai 20-ǵa jýyq qońyraý týraly aqparat túsken. Bul – turǵyndardyń «102» arnasyna habarlaǵan faktileri ǵana. Jańa shema boiynsha bir qylmystyq is tirkelip, oblys aýdandarynyń birinde turatyn 44 jastaǵy turǵynnyń 4 mln teńgesinen aiyrylǵany anyqtaldy.
Politsiia azamattarǵa HQKO men eGov qyzmetkerleri telefon arqyly bank kartasynyń derekterin, shottaǵy qarajat týraly málimetti nemese basqa da banktik qupiia aqparatty suramaitynyn eskertedi.
«Mundai qońyraýlarǵa senbeńizder. Bógde adamdardyń nusqaýy boiynsha nesie rásimdep, aqsha aýdarmańyzdar», – dep eskertti tártip saqshylary.
SQO-da jyl basynan beri internet-alaiaqtyqtyń 389 faktisi tirkelgen. Bul ótken jyldyń sáikes kezeńimen salystyrǵanda shamamen 24 paiyzǵa az. Onyń 248-i turǵyndardy iri kólemde nesie rásimdeýge kóndirýge baǵyttalǵan alaiaqtyq shemalarǵa qatysty.
Politseiler turǵyndarǵa internet-alaiaqtyqtyń aldyn alý maqsatynda WhatsApp messendjerindegi arnaiy topqa qosylýdy usynady. Topqa QR-kod arqyly ótýge bolady. Onda politsiia qyzmetkerleri alaiaqtardyń keń taraǵan tásilderi týraly aqparat berip, turǵyndardyń suraqtaryna jaýap beredi.
Kiberqylmys boiynsha keńes alý nemese aqparat berý úshin azamattar +7-708-022-09-45 senim telefonyna anonimdi túrde habarlasa alady.
Buǵan deiin «SMS-blaster» arqyly 150 myń alaiaqtyq habarlama taratqan top ustalǵanyn jazǵan edik.
