Májilis Tóraǵasy Nurlan Nyǵmatýlin temeki ónimderine arnalǵan aktsizder mólsherlemelerin aiqyndaý kezinde naryqtyń ózgerýine jedel den qoiý Qazaqstannyń múddelerin saqtaýǵa da, EAEO-nyń tiisti kelisimi sheńberinde elimizdiń mindettemelerin oryndaýǵa da yqpal etedi dep esepteidi, dep habarlaidy "Ult aqparat" tómengi palatanyń baspasóz qyzmetine siltememen.
Búgin Májilistiń jalpy otyrysynda «Eýraziialyq ekonomikalyq odaqqa múshe memleketterdiń temeki ónimderine aktsizder salasyndaǵy salyq saiasatyn júrgizý qaǵidattary týraly kelisimdi ratifikatsiialaý týraly» zań jobasy maquldandy.
Kelisimge sáikes 2024 jyldan bastap EAEO elderi temekige 1 myń dana úshin 35 evro indikativtik mólsherlemeni tiisinshe 20% - ǵa aýytqý quqyǵymen qoldanýy tiis.
Bul rette temeki ónimderine aktsizderdi kezeń-kezeńimen úilestirý kózdeledi.
Osy zań jobasyn talqylaý barysynda Májilis Tóraǵasy Nurlan Nyǵmatýlin eger ulttyq valiýtanyń eýroǵa qatysty baǵamy ózgerse bul temekige aktsizdiń mólsherlemesine, sondai-aq bólshek saýda baǵalaryna qalai áser etetinine kóńil bólý kerektigin aitty.
Ulttyq ekonomika ministri Áset Erǵaliev túsindirgendei, baǵam kúrt ózgergen jaǵdaida EAEO-ǵa múshe elderdiń árqaisysy aktsizderdiń indikativtik mólsherlemesin qaita qaraýdy surap, Eýraziialyq ekonomikalyq komissiiaǵa júginýge quqyqy bar jáne sheshim tolyq konsensýsqa qol jetkizilgen kezde, iaǵni EAEO-nyń barlyq músheleri kelisetin kezde qabyldanady.
Osyǵan orai, Nurlan Nyǵmatýlin bul jerde kóp jaǵdai Ulttyq ekonomika ministrligi qyzmetkerleriniń, sondai-aq, Eýraziialyq ekonomikalyq odaq komissiiadaǵy ókilderdiń, olardyń kýrstyń barlyq ózgeristerine jedel is-áreket etýlerine bailanysty bolatynyn atap ótip, osy Kelisim sheńberinde Qazaqstannyń múddesin, elimizdiń mindettemelerin de saqtaý maqsatynda ýaqytyly sharalar qabyldaý qajettigin aitty.
Jalpy, zań jobasy temeki ónimine arnalǵan aktsizder mólsherlemelerin úilestirý jolymen EAEO sheńberinde temeki ónimderi naryǵynyń jumys isteýi úshin jaǵdailardy qamtamasyz etýge baǵyttalǵan. Bul temeki ónimderiniń zańsyz ainalymyn tejeýge múmkindik beredi.
