Eýraziialyq ekonomikalyq odaq aiasyndaǵy saýdaǵa kedergilerdiń 80 paiyzy joiyldy. Bul týraly QR Saýda jáne integratsiia ministri Baqyt Sultanov aitty, dep habarlaidy QazAqparat.
«Eýraziialyq integratsiiany damytý aiasynda 2025 jylǵa deiingi EAEO strategiiasyn júzege asyrý is-sharalarynyń jospary bekitilip, ózara is-qimyldyń negizgi vektorlary aiqyndaldy. Kooperatsiia, halyqaralyq yntymaqtastyq jáne kedergilerdi joiý máseleleri basymdyqqa ie. Qazaqstandyq taraptyń bastamasymen taýarlardyń ázirenýin dáleldeitin sertifkattyń jańa túri - tez buzylatyn ónimderge arnalǵan «seriialyq ónimder sertifikaty» engizildi. Ol taýarlarymyzdyń EAEO naryǵyna shyǵýyn jeńildetedi ári eksporttaýshylardyń qarjylyq shyǵyndaryn tómendetedi. Qazirgi ýaqytta atalǵan sertifikat beriletin taýarlar tizilimin keńeitý úshin kelissóz júrgizip jatyrmyz», - dedi ministr Senatta ótken Úkimet saǵatynda.
Ol Eýraziialyq ekonomikalyq odaqtyń ishki naryǵynda kedergisiz orta úshin jaǵdai jasap júrgizilip jatqanyn aitty.
«2016 jyldan osy ýaqytqa deiin kedergilerdiń 80 paiyzy joiyldy. Onyń ishinde biyl 2,7 mln dollarǵa 3 kedergi alynyp tastaldy. Buǵan qosa, seriktesterimizben osy jyldyń sońyna deiin 1,8 mlrd dollarǵa taǵy 3 kedergini alyp tastaýǵa ýaǵdalastyq. Biz ázirlegen kedergilerdi moiyndaý ádisteme bekitildi. Endigi ýaqytta búkil protsess 70 kúndi quraidy. Eski ádistemege sáikes bul protsess 2 jylǵa deiin sozylatyn. Kedergilerdi joiý jónindegi ulttyq jol kartasyn júzege asyrý jalǵasýda. Búginde biz 600 mln dollardan astamǵa 8 kedergini joia aldyq. Olar memlekettik satyp alý, salyq salý, eńbek migratsiiasy, sý kóligi jáne taýarlardyń jekelegen túrlerin satýǵa qatysty», - dedi Baqyt Sultanov.
