Úkimet basshysynyń birinshi orynbasary – Qarjy ministri Álihan Smaiylov Májiliste Eýraziialyq ekonomikalyq odaqtyń kedendik aýmaǵyna ákelingen taýarlardy qadaǵalaý tetigi boiynsha kelisimdi ratifikatsiialaý týraly zań jobasyn tanystyrdy, dep habarlaidy QazAqparat.
Álihan Smaiylov aityp ótkendei, kelisimge 2019 jyly 29 mamyrda Nur-Cultandaǵy Joǵarǵy Eýraziialyq ekonomikalyq keńes otyrysynda EAEO múshe memleketter basshylary qol qoiǵan.
«Kelisimniń negizgi maqsaty - taýarlar ainalymyn tiimdi baqylaý, zańsyz ainalymdy anyqtaý, salyqtan jaltarý jaǵdailaryn joiý, biýdjetke túsetin salyq pen keden tólemderin ulǵaitý. Kelisimniń erejeleri EAEO kedendik aýmaǵyna ákelingen taýarlardy qadaǵalaý tetigin qurý merzimderi men tártibin reglamentteidi. Qadaǵalaý importtyq taýarlar boiynsha júzege asyrylady. Qadaǵalaýǵa jatatyn taýarlardyń tizbesin EEK keńesi bekitedi», - dedi zań jobasyn tanystyrǵan Álihan Smaiylov Parlament Májilisiniń jalpy otyrysynda.
Onyń aitýynsha, qadaǵalaý merzimi bes jyldy quraidy. Árbir memleket óziniń Ulttyq qadaǵalaý júiesin qurýy qajet. Sondai-aq, ózderiniń salyq tóleýshileriniń ilespe qujattarynyń osy júiede rásimdelýin baqylaýdy qamtamasyz etýi tiis. Qujattardy mundai rásimdeýsiz EEAO sheńberinde taýarlardyń tasymaldanýyna tyiym salynady.
«Kelisimde Keden odaǵyna múshe memleketter arasynda qadaǵalaý jónindegi aqparat almasý boiynsha talaptar aiqyndalǵan. Mundai almasý EEAO integratsiialanǵan aqparattyq platformasy arqyly turaqty túrde júzege asyrylady. Qurmetti depýtattar, taýarlar ainalymyn qadaǵalaý tetigin engizý 2025 jylǵa deiin EEAO tsifrlyq kún tártibin iske asyrý úshin negizin qalaýshy mindet bolyp tabylady. Kelisimdi ratifikatsiialaýdan keiin 12 ai ótken soń barlyq múshe-memleketter pilottyq jobany iske qosady. Pilottyq jobanyń qortyndylary boiynsha qadaǵalaý júiesiniń turaqty jumys isteýine kóshý týraly sheshim qabyldanady», - dedi ol.
