EAEO damý strategiiasynan Qazaqstannyń múddesine qaishy keletin 240 is-sharanyń kúshi joiyldy. Saýda jáne integratsiia ministrliginiń alqa otyrysynda vitse-ministr Janel Kúshikova osylai dedi, dep habarlaidy QazAqparat.
«Byltyrǵy jyl eshkimge de ońai bolǵan joq. Pandemiianyń saldarynan eń birinshi kezekte halyqaralyq saýda zardap shekti. UNCTAD derekteri boiynsha 2020 jyldyń 3 toqsanynyń sońynda álemdik saýda 8%-ǵa azaiǵan. Eýraziialyq ekonomikalyq komissiianyń baǵalaýy boiynsha, EAEO syrtqy saýda kólemi 2020 jyldyń sońyna qarai 16,5% -ǵa, al ishki saýdasy 11,5% -ǵa tómendedi», - dedi Janel Kúshikova.
Ol sondai-aq ótken jyly EAEO organdarynyń alańynda 650-den astam akti qabyldanǵanyn, olar klassikalyq tórt erkindik (taýarlar, qyzmetter, kapital jáne jumys kúshi) maqsatyn iske asyrýǵa baǵyttalǵanyn aityp ótti.
«Eýraziialyq ekonomikalyq odaq aiasynda ótken jyldyń eń mańyzdy oqiǵasynyń biri - EAEO-nyń 2025 jylǵa deiingi damý strategiiasyn qabyldaý boldy. Qujat - EAEO elderi men komissiianyń eki jyldyq birlesken jumysynyń nátijesi. Oǵan Eýraziialyq keńistiktegi aldaǵy besjyldyqtaǵy integratsiialyq protsesterdi damytýdyń negizgi baǵyttary kiredi. Strategiiany daiyndaý kezeńinde biz ulttyq múddelerge qaishy keletin 246 is-sharany joiý týraly mámilege qol jetkizgenimizdi atap ótkim keledi. Sonymen qatar, biz damý strategiiasyna qajetti mazmundaǵy 106 is-sharany engizdik», - dep atap ótti spiker.
