Foto: gov.kz
Astanada «e-Otinish» aqparattyq júiesiniń 5 jyldyǵyna orai «e-Otinish» – «Halyq únine qulaq asatyn memleket» tujyrymdamasyn iske asyrýdyń negizgi quraly» taqyrybynda konferentsiia ótti. Mereitoilyq is-sharaǵa QR Prezidentiniń quqyq máseleleri jónindegi kómekshisi Erjan Jienbaev, Premer-ministrdiń orynbasary – Mádeniet jáne aqparat ministri Aida Balaeva, sondai-aq ortalyq memlekettik jáne jergilikti atqarýshy organdardyń ókilderi qatysty. Bul týraly QR Mádeniet jáne aqparat ministrliginiń baspasóz qyzmetine silteme jasap, Ult.kz habarlaidy.
Jiynda Prezident kómekshisi Erjan Jienbaev júieniń memlekettik basqarý mádenietin jetildirýdegi mańyzyna toqtaldy.
«Bes jyl ishinde «e-Otinish» júiesi halyqtyń memlekettik institýttarǵa degen kózqarasyn aiqyndaityn obektivti indikatorǵa ainalyp, ashyqtyq pen eseptilikke negizdelgen memlekettik qyzmettiń jańa ádebin qalyptastyrýǵa yqpal etti. Azamattardyń ótinishterimen jumys biryńǵai ári tutas tetik retinde jolǵa qoiyldy. Bul mehanizm ótinishterdi jedel qaraýdy ǵana emes, memlekettik organdar qyzmetine obektivti baǵa berýdi de qamtamasyz etedi», – dedi Erjan Jienbaev.
Qatysýshylardy quttyqtaǵan Premer-ministrdiń orynbasary «e-Otinish» Memleket basshysynyń «Halyq únine qulaq asatyn memleket» qurý jónindegi strategiialyq baǵytynyń is júzinde júzege asqan kórinisi ekenin atap ótti.
«Qasym-Jomart Kemeluly Toqaevtyń bastamasymen júzege asqan konstitýtsiialyq reformalar Ádiletti Qazaqstandy qalyptastyrýdyń jańa standarttaryn bekitti. Onyń ózeginde adam quqyǵy, biliktiń qoǵam aldyndaǵy jaýapkershiligi jáne azamattarmen ashyq dialog qaǵidattary tur. «e-Ótinish» júiesiniń qyzmeti dál osy qaǵidattarmen tolyq úndesedi. Osy ýaqyt ishinde júie azamattardyń ótinish berý jáne memlekettik máselelerdi sheshýge qatysý jónindegi konstitýtsiialyq quqyǵyn iske asyratyn pármendi tetikke ainaldy. Jyl saiyn osy júie arqyly azamattardyń milliondaǵan ótinishi qaralady. Árbir kórsetkishtiń artynda naqty adam, onyń máselesi, ádildikke degen úmiti jáne memleketke artqan senimi tur. Shyn máninde, «e-Ótinish» qoǵam men bilik institýttary arasyndaǵy senim kópiri bolyp otyr», – dedi Aida Balaeva.
Konferentsiia barysynda Ótinishterdi qaraýdy baqylaý bóliminiń meńgerýshisi Qanatbek Jaisanbaev, AMANAT partiiasy Saiasi menedjment akademiiasynyń direktory Tamara Dúisenova, QR Bas prokýratýrasy Quqyqtyq statistika jáne arnaiy esepke alý jónindegi komitetiniń tóraǵasy Sábit Nurlybai, QR Joǵarǵy Sotynyń ákimshilik ister jónindegi sot alqasynyń tóraǵasy Aslan Túkiev quttyqtaý sóz sóiledi.
Is-shara azamattarmen tikelei jumys isteitin front-liniialar qyzmeti, memlekettik sektordaǵy jasandy intellektiniń róli jáne halyqpen ózara is-qimyl standarttary týraly baiandamalarmen jalǵasty.
Búginde «e-Otinish» shamamen 50 myńdai memlekettik organ men uiymdy biriktirgen tolyqqandy memlekettik ekojúiege ainaldy. Platformany 3 millionnan astam azamat paidalanady. Júie arqyly 5 jyl ishinde 16 millionnan astam ótinish qaraldy.
Konferentsiia memleket pen qoǵam arasyndaǵy ózara is-qimyl salasyn damytýǵa úles qosqan memlekettik qyzmetshilerdi marapattaý rásimimen qorytyndylandy.
Qasym-Jomart Toqaevtyń Jarlyǵymen birqatar azamat memlekettik nagradalarmen – «Qurmet» ordenimen, II dárejeli Baýyrjan Momyshuly atyndaǵy «Aibyn» ordenimen jáne «Eren eńbegi úshin» medalimen, sondai-aq Prezidenttiń «Qurmet» gramotasy jáne «Alǵys» hatymen marapattaldy. Sonymen qatar birqatar memlekettik qyzmetshige Premer-ministrdiń orynbasary – Mádeniet jáne aqparat ministriniń alǵys hattary tabystaldy.
Konferentsiia aiasynda azamattardyń ótinishterimen jumys isteýdiń praktikalyq máselelerine arnalǵan taqyryptyq seminarlar da ótti.
