Dziýdodan áielder men erler arasynda Aqtaýda ótip jatqan el chempionatynda tórt salmaqta jeńimpaz-júldegerler belgili boldy, dep habarlaidy "Ult aqparat".
QR dziýdo federatsiiasy málim etkendei, jarystyń úshinshi kúni áielder arasynda 63 kg salmaqta almatylyq Iolanta Berdibekova top jardy.
Ol finalda shyǵysqazaqstandyq Kristina Sotnikovany utty. Taǵy bir almatylyq Saera Myrzahmetova men shyǵysqazaqstandyq Zarina Saripova qola júldeni qanaǵat tutty.
70 kg salmaqta shyǵysqazaqstandyq Zere Bektasqyzynyń mereii ústem boldy. Túrkistandyq Perizat Jaqypbekova ekinshi, Almaty oblysynyń ókili Janar Qashqyn men almatylyq Daiana Talǵat úshinshi orynǵa kóterildi.
Erler arasynda 81 kg salmaqta finalda qyzylordalyq Abylaihan Jumanazardy súrindirgen elordalyq Mádi Amangeldi jeńimpaz atandy. Mańǵystaýlyq Rýslan Musaev pen túrkistandyq Erehan Nuridin qola medaldi enshiledi.
Talai dodada olja salǵan túrkistandyq Didar Hamza 90 kg salmaqta úzdik shyqty. Shymkenttik Ersultan Muzapparov ekinshi, qostanailyq Aslan Saǵitbek pen aqtóbelik Ádilet Misin úshinshi orynǵa ilikti.
