Búgin Qyrǵyzstan astanasy Bishkek qalasynda dziýdodan Aziia chempionaty bastaldy, dep habarlaidy "Ult aqparat".
Balýandar bes salmaqta synǵa tústi. Onyń 2-ýi erler arasynda bolsa, 3-ýi qyzdar arasynda ótti.
Qazaqstandyq balýandar arasynan 60 kelide tatami tórine shyqqan Eldos Smetov shirek finalda qyrǵyzstandyq Kýbanychbek Aibekulyna ese jiberdi. Sol salmaqta qazaqstandyq Ǵusman Qyrǵyzbaev birinshi ainalymda avstraliialyq Djoshýa Kettske jol berdi.
Al 66 kelide taǵy bir qazaqstandyq balýan Eldos Jumaqanov qorjynǵa qola júlde saldy. Ol jubanysh finalynda qyrǵyzstandyq Artýr Teni jeńip ketti.
Qyzdar arasynda 52 kelide beldesken Nursulý Eralieva men Ǵaliia Tynbaeva jarystyń alǵashqy ainalymda qarsylastaryna ese jiberdi.
Qazaqstandyq Abiba Ábýjaqynova 48 kelide Aziia chempionatynyń kúmis júldesine ie boldy. Ol finalda qytailyq Li Iananǵa ese jiberdi.
Al Sevara Nishanbaeva 57 kelide qola júldege qol sozdy.
Biylǵy Aziia chempionatyna 30 elden barlyǵy 215 dziýdoshy qatysady. Qazaqstan quramasynan 17 tatami sheberi el namysyn qorǵaityn bolady.
Endi Aziia chempionatynda 73 kelide Jansai Smaǵulov, 81 kelide Didar Hamza men Rýslan Musaev, 90 kelige deiingi salmaqta Islam Bozbaev beldesse, 100 kelide Aibek Serikbaev, asa aýyr salmaq dárejesinde Erasyl Qajybaev kúresedi. Qyzdar arasynda 63 kelide Iolanta Berdibekova, 70 kelide Zere Bektasqyzy, 78 kelide Kamila Berliqash tatami tórinde taitalasqa túsedi. Aziia chempionaty 9 sáýirde máresine jetedi.
