AQSh-taǵy prezident sailaýynda jeńgen Djo Baidenge dúisenbi kúni koronavirýs vaktsinasy egildi. Baidenge dári egý protsesi ulttyq telearnadan tikelei efirde kórsetildi. Keiin ol Delaver shtatyndaǵy ChristianaCare klinikasynyń qyzmetkerine alǵys aityp, jappai egý baǵdarlamasynyń bastalýyna muryndyq bolǵan Donald Tramp ákimshiliginiń jumysyn joǵary baǵalady.
Baiden amerikalyqtarǵa vaktsinanyń qaýipsiz ekenin aitty.
"Men muny vaktsina ázir bolǵan kezde adamdar salǵyzýǵa daiyn bolýy úshin jariia túrde kórsetip jatyrmyn. Ýaiymdaityn sebep joq. Men ekinshi ekpeni asyǵa kútemin", - dedi ol.
Baiden vaktsinany jubaiy Djill de salǵyzǵanyn atap ótti.
Prezidenttiń baspasóz hatshysy Djen Psaki, vitse-prezident Kamala Harris jáne onyń kúieýi Dýg Emhoff kelesi aptada ekpe salǵyzatynyn aitty.
Bunyń aldynda vitse-prezident Maik Pens bastaǵan birqatar saiasatker jurttyń kózinshe koronavirýs ekpesin saldyrtqan. Saiasatkerler osylaisha vaktsinanyń qaýipsiz ekenin dáleldegisi keletinin aityp, amerikalyqtardy egýden bas tartpaýǵa úndegen.
Baidenge Pfizer jáne BioNTech korporatsiiasynyń preparaty salynǵan. AQSh-ta turǵyndarǵa Moderna kompaniiasynyń vaktsinasy da salynyp jatyr.
78 jastaǵy Baidendi dárigerler jasyna bailanysty koronavirýs infektsiiasyn aýyr qabyldaýy múmkin topqa jatqyzady. Ol qoǵam aldynda únemi maska taǵyp júredi. Júrgen jerinde amerikalyqtardy saqtyq sharalaryn oryndaýǵa shaqyrýmen keledi.
AQSh-ta kún saiyn ortasha eseppen 200 myńnan astam koronavirýsqa shaldyǵady. Infektsiia juqtyrǵandar 18 millionnan asty. 320 myńy qaitys boldy.
