Demokrattar atynan AQSh prezidentigine kandidat Djo Baiden 6 qarashada Pensilvaniia shtatynda 95 paiyz biýlleten sanalǵan soń qazirgi prezident Donald Tramptan 5 myńnan asa daýyspen alǵa shyqty. Qazir bul shtatta Baiden 49,5 paiyz, Tramp 49,3 paiyzben tur. Shtatta áli bes paiyz biýlleten sanalýy kerek. 20 elektoraldy daýysqa ie Pensilvaniia Baidenge daýys berse, ol jeńis úshin kerekti 270 daýysty ielenip, prezident bolyp sailanady.
Qazir Baidende sailaýshylar alqasynyń 253 daýysy, Trampta 214 daýysy bar.
Baiden 6 qarasha tańerteń Tramp Djordjiia shtatynda da 1097 daýyspen alǵa shyqty. Bul shtatta áli bir paiyz biýlleten sanalýy tiis. Djordjiia shtatynda 16 elektoraldy daýys bar.
Baiden Arizona, Nevada shtattarynda da alda keledi. Biraq Arizonada alty, Nevadada on paiyz biýlleten áli sanalǵan joq. Tramp Soltústik Karolina men Aliaska shtatynda alda keledi.
Tramptyń komandasy daýys sanaýmen kelispei birneshe shaǵym túsirip, birneshe shtattaǵy daýys sanaýdy toqtatýdy talap etken. Sarapshylar Tramptyń sotqa shaǵymy sailaý nátijesine áser etýi ekitalai dep sanaidy.
5 qarashada Tramp jurt aldynda sóz sóilep, demokrattar "sailaýdy urlap alýǵa tyrysty" dep aiyptady, biraq naqty dálelder keltirmedi. AQSh-tyń birneshe telearnasy Tramp dálelsiz málimdeme jasap jatqanda efirdi úzip tastady. Sondai-aq Twitter men Facebook Tramp málimdemesiniń videosyn "daýly kontent" dep belgiledi.
Al Djo Baiden amerikalyqtardy shydamdy bolýǵa shaqyryp, sailaýda jeńetinine senim bildirdi.
Amerikalyqtar 3 qarashada prezident sailaýynda daýys berdi. Milliondaǵan adam erte sailaý kezinde poshta, faks jáne elektrondy poshta arqyly daýys berdi. AQSh-ta halyq prezidentti tikelei sailamaidy, olar ár shtattyń halqynyń sanyna bailanysty qurylǵan sailaýshylar alqasy arqyly daýys beredi. Úmitker prezident bolý úshin sailaýshylar alqasyndaǵy 538 daýystyń keminde 270-in alýy kerek.
