20 qańtarda Vashingtondaǵy Kapitolii saraiynda ant berip, prezident qyzmetine kirisken Djo Baiden saltanatty rásimnen soń burynǵy prezident Donald Tramptyń birqatar sheshimderiniń kúshin joidy.
Atap aitqanda, prezident AQSh-ty klimat jónindegi Parij kelisimine qaita qosyp, AQSh-tyń Dúniejúzilik densaýlyq saqtaý uiymyna músheligin qalpyna keltirdi.
"Biz buryn-sońdy bolmaǵan dárejede klimattyń ózgerýmen kúresemiz" dedi Baiden. AFP agenttigi onyń sózinen úzindi keltirdi.
"Amerika daýysy" saitynyń jazýynsha, Baiden sonymen birge musylmandar kóp shoǵyrlanǵan keibir el turǵyndarynyń AQSh-qa kirýine qoiylǵan shekteýdi joiatyn buiryqqa qol qoiǵan. Kapitoliidegi saltanatty shara aiaqtala salysymen onyń kómekshileri Baidenniń AQSh pen Meksika arasyndaǵy dýal qurylysyn toqtatatynyn da habarlaǵan.
Donald Tramp 2017 jyly Parij kelisimin "AQSh ekonomikasy úshin qolaisyz kelisim boldy" dep atap, óz elin bul kelisimnen shyǵaratynyn málimdegen. AQSh resmi túrde bul kelisimnen 2020 jyly qarasha aiynda shyqty. Onyń qaita qosylýy úshin bir ai ýaqyt kerek bolady.
Senator-respýblikashyl Ted Krýz Baidenniń Parij kelisimine oralý bastamasyn synap, "bul sheshim Amerikany álemde kóshbasshy etpeidi, klimat máselesin de sheshpeidi, sonyń saldarynan myńdaǵan amerikalyq jumysynan aiyrylady" dep málimdedi. Al senator-respýblikashyl Kevin Kramer Baiden sheshimin "aqylǵa qonymdy qadam" dep atap, tek jańa ákimshilik Amerikanyń ulttyq múddesin umytpai, amerikalyq salyq tóleýshilerdiń aqshasynyń ysyrap bolýyna jol bermeýi tiis dedi.
