19 aqpan kúni Miýnhendegi qaýipsizdik jónindegi dástúrli jiynda sóilegen AQSh prezidenti Djo Baiden Amerika álem arenasyna, transatlantika odaǵyna qaita oraldy dep málimdedi.
Ol Vashingtonnyń Eýropamen áriptestikti jalǵastyrýǵa múddeli ekenin aitty. "Demokratiia joq jerden ózdiginen paida bolmaidy jáne ol avtokratiiany jeńýi tiis" dedi Baiden.
AQSh prezidenti óz sózinde Reseidiń AQSh, Eýropa men ózge de elderdegi demokratiiany shaiqaltýdy kózdeitin teris piǵylmen qareket jasaǵanyn aitty. Kreml buǵan deiin ondai aiyptaýlardy teristep kelgen.
Baiden AQSh-tyń Eýropadaǵy odaqtastaryn Vashingtonnyń ustanymyn qoldaýǵa shaqyrdy. Ol sonmen birge AQSh pen Resei arasyndaǵy iadrolyq qarý-jaraqty qysqartý týraly kelisimniń uzartylýyn oń baǵalaitynyn aitty.
AQSh prezidenti Vashingtonnyń Ýkraina jeriniń tutastyǵyn qoldaityn ustanymynan ainymaitynyn málimdedi.
Miýnhendegi jiyndaǵy óz sózinde Baiden AQSh-tyń Dúniejúzilik densaýlyq saqtaý uiymynyń álem elderine koronavirýsqa qarsy vaktsinany ádiletti úlestirýdi kózdeitin SOVAX halyqaralyq baǵdarlamasyna eki milliard dollar bóletinin aitty. COVAX baǵdarlamasy kedei elderge koronavirýsqa qarsy vaktsinamen járdem kórsetý maqsatynda qabyldanǵan.
Juma kúni Djo Baiden Miýnhendegi qaýipsizdik jónindegi jiynnan basqa "Úlken jetilik" (G7) elderiniń onlain jiynynda da sóilegen. G7 quramyna AQSh-pen birge Ulybritaniia, Germaniia, Italiia, Kanada, Frantsiia men Japoniia enedi. Buryn onyń quramynda Resei de bolǵan kezde G8 dep atalatyn. 2014 jyly Resei Ýkraina quramyndaǵy Qyrym túbegin anneksiialap alǵannan keiin ózge elder ony bul toptan shyǵarǵan.
