Dúisenbi, 25 sáýirde AQSh prezidenti Djo Baiden Bridjet Brinkti Amerikanyń Ýkrainadaǵy jańa elshisi etip taǵaiyndaǵanyn habarlady, dep jazady Azattyq.
Bridjet Brink AQSh-tyń Slovakiiadaǵy elshisi qyzmetinde bolǵan. Buǵan deiin ol AQSh-tyń Ózbekstan men Grýziiadaǵy elshilikterinde, AQSh-tyń qaýipsizdik keńesi men memlekettik departamentinde jumys istegen.
AQSh-tyń Ýkrainadaǵy elshisi qyzmeti keiingi úsh jylǵa jýyq bos turdy. Baiden ákimshiligi bul qyzmetke adam taǵaiyndaýǵa asyqpaǵany úshin synǵa qalǵan edi. Bridjet Brinktiń elshi bolyp taǵaiyndalǵany jaily jańalyqty zań shyǵarýshylar, sarapshylar men diplomatiialyq korpýstaǵy áriptesteri qýana qabyldady.
Senattaǵy demokrattardyń jetekshisi Chak Shýmer bul sheshimdi «syn saǵatyndaǵy keremet jańalyq» dep baǵalasa, Polshadaǵy AQSh elshisi Deniel Frid Brinkti kópshilik «qurmetteitinin, syilaitynyn» aitqan.
Resei áskeriniń Ýkrainaǵa kirgen alǵashqy kúnderi AQSh-tyń Slovakiiadaǵy elshisi bolyp júrgen Bridjet Brink Ýkraina men Slovakiia shekarasyndaǵy bosqyndarmen kezdesip, Slovakiia biligi men halqyn bosqyndarǵa qoldaý kórsetkeni úshin alǵys aitqan.
AQSh memlekettik departamentiniń habarlaýynsha, Reseidiń Ýkrainaǵa shabýylyna deiin eki apta buryn Kievten ketken amerikandyq diplomattar osy aptada jumysyn qaita bastamaq. Qazir Polshadan jumys istep otyrǵan amerikalyq diplomattar ázirge kún saiyn shekaraǵa jaqyn ornalasqan Lvov qalasyna baryp-kelip jumys isteitin bolady.
