20 qańtarda inaýgýratsiiasy ótetin AQSh-taǵy prezident sailaýynyń jeńimpazy atanǵan Djo Baiden prezidenttiginiń alǵashqy 100 kúninde amerikalyqtardy maska taǵyp júrýge shaqyrdy.
Baidenniń pikirinshe, bul amal virýsty aitarlyqtai tejeýge kómektesýi tiis. Ókiletine áli kirise qoimaǵan Amerikanyń kelesi prezidenti bul pikirin CNN telearnasyna bergen suhbatynda aitqan. Ol buǵan qosa, Amerikanyń barlyq úkimettik mekemelerinde maska taǵyp júrýdi mindetteitin buiryq shyǵaratynyn da jetkizgen.
Koronavirýs indeti bastalǵaly beri AQSh-ta 14 millionnan astam adamǵa koronavirýs juqqan, shamamen 267 myń adam qaitys bolǵan. AQSh koronavirýs juqtyrǵandar men virýstan qaitys bolǵandar sany jaǵynan álemde birinshi orynda tur.
"Júz kún ǵana taǵý. Sol kezde vaktsinatsiia da nátijesin berip, naýqastar sany edáýir azaiady dep oilaimyz" dedi Baiden telearna tilshisine.
AQSh Konstitýtsiiasy boiynsha mamandanǵan amerikalyq sarapshynyń aitýynsha, prezident azamattardy maska taǵyp júrýge mindettei almaidy. Biraq CNN telernasyna bergen suhbatynda Baiden vitse-prezident retinde sailanǵan Kamala Harrispen birge birinshi bolyp ózderi maska taǵyp, amerikalyqtarǵa úlgi kórsetetinin aitqan.
Telearnaǵa bergen suhbatynda Baiden Entoni Faýchidi AQSh-tyń bas infektsionist-sarapshysy retinde qaldyratynyn aitqan. Faýchi týraly aityp turyp, vaktsinanyń qaýipsizdigine turǵyndardyń kózin jetkizý qajettigin de alǵa tartqan.
Al Entoni Faýchidiń ózi BBC saityna bergen suhbatynda Ulybritaniianyń nemis jáne amerikalyq kompaniialar birlesip ázirlegen vaktsinany jyldam maquldaýyn synaǵany úshin keshirim suraǵan. Eki kún buryn Ulybritaniianyń Pfizer/BioNTech vaktsinasyn jappai qoldanýdy maquldaǵany belgili bolǵan kezde Faýchi amerikalyq BAQ-qa "Ulybritaniia tym asyǵystyq jasady" degen.
Al Djo Baiden vaktsina qaýipsizdigine bailanysty qoǵamda týyndaǵan kúmándi seiiltý úshin jurt aldynda koronavirýs vaktsinasyn saldyratynyn aitqan. Onymen birge Amerikanyń burynǵy basshylary Barak Obama, kishi Djordj Býsh, Bill Klinton da kópshilik aldynda vaktsina saldyrýdy josparlap otyr.
Osyǵan deiin amerika-germaniialyq Pfizer/BioNTech jáne amerikalyq Moderna ózderiniń vaktsinasy 95 paiyz tiimdilik kórsetkenin málimdegen. Firmalar AQSh sanitarlyq qadaǵalaý basqarmasyna vaktsinany tirkeý týraly ótinish te berip qoiǵan.
Ulybritaniia - Pfizer/BioNTech kompaniiasynyń vaktsinasyn maquldaǵan álemdegi alǵashqy el.
