Qazaqstan-Qytai kinofestivaliniń ashylý saltanatyna arnaiy kelgen qytailyq tanymal akter Djeki Chan Dimash Qudaibergenniń kinoǵa túsýi jaiynda óz oiyn bildirdi, dep habarlaidy QazAqparat.
Djeki Chan kinofestivaliniń ashylý saltanatyna arnalǵan baspasóz máslihatynda QazAqparat agenttiginiń suraǵyna: «Teledidardan Dimashtyń keremet daýysyn estip, jas talanttyń ónerine tánti boldym. Keiin ol meniń fanatym ekenin bildim. Árine, men ony kino salasynda óte tamasha akter bolady dep oilaimyn», - dep jaýap qaitardy.
Búgin Astana qalasyndaǵy Qazmedia ortalyǵynda «Qazaqstan-Qytai kinofestivaliniń» ashylý saltanaty ótip jatyr. Keshtiń qurmetti qonaǵy retinde Oskar syilyǵynyń iegeri, álemge tanymal qytailyq akter Djeki Chan kelip otyr.
Eske sala keteiik, álemdik akter, kaskadior, kinorejissior, kinoprodiýser, stsenarist, ánshi, milliondaǵan kórermenniń súiiktisine ainalǵan ańyz adam - Djeki Chan keshe alǵash ret Astanaǵa keldi. Sharanyń basty uiymdastyrýshylary - «Qazaqstan» respýblikalyq teleradiokorporatsiiasy men QHR Baspasóz, baspa, radio, kino jáne televiziia isi jónindegi memlekettik basqarmasy.
Aita ketý kerek, 7-18 maýsym aralyǵynda Astanada ótetin Qytai kinosy festivali aiasynda elordalyqtar men qala qonaqtary «Ile ózeni», «Shynaiy mahabbat», «Gúlim», «Qaterli isik myrza, ketińiz», «Qasqyr totemi» syndy týyndylardy tamashalai alady.
Aita keteiik, Qytaida Singer 2017 án baiqaýyna qatysqan qazaqstandyq ánshi Dimash Qudaibergen áigili kino akteri Djeki Chanmen kezdesip, qazaqi shapan kigizgen bolatyn.
Budan soń Dimash instagram paraqshasyna «Búgin meniń ómirimde tarixi este qalatyn erekshe kún. Ataqty akter Djeki Chan myrza meni teledidardan kórip, kezdesýge shaqyrdy. Kezdesýde akter maǵan óziniń ekskliýzivti kúrteshesin jáne arnaiy firmalyq án tyńdaý qurylǵysyn syiǵa tartty. Al men akterge qazaqtyń shapanyn jaýyp, dombyrany syiǵa tarttym. Dombyramen bir kúi shertip berýimdi ótingen Djeki Chanǵa Nurǵisanyń «Álqisasynan» shashý shashtym! Óz kezeginde akter maǵan sońǵy «Kung Fu Yoga» kinokartinasyndaǵy bi qimyldaryn úiretti. Bala kezimnen beri kele jatqan súiikti akterim maǵan óz aqyl keńesterin berip, shyǵarmashylyǵymdy baqylaitynyn aitty. Sóz sońynda, barsha Qazaqstan xalqyn jańa jyl merekesimen quttyqtap, ádemi lebiz-tilegin bildirdi. Kelesi kezdesýdi asyǵa kútemiz. Armandar oryndalady!», - dep jazdy.
