Álemge áigili akter, rejisser ári prodiýser Djeki Channyń Almatyǵa kelýi qarsańynda qalada qaýipsizdik sharalary kúsheitildi. Osyǵan bailanysty Almaty qalasy politsiia departamentinde halyqaralyq kino jobasyn túsirý kezeńinde qoǵamdyq tártip pen qaýipsizdikti qamtamasyz etýge arnalǵan keńeitilgen jumys keńesi ótti, dep habarlaidy ult.kz.
Jiynǵa qoǵamdyq qaýipsizdik, jol qozǵalysyn uiymdastyrý, is-sharalardy súiemeldeý jáne túsirilim tobymen ózara is-qimyldy úilestirýge jaýapty bólimshe basshylary qatysty.
Almaty qalasy politsiia departamentiniń bastyǵy Aidyn Qabduldinov halyqaralyq deńgeidegi kinojobanyń Almatyda túsirilýi shahar úshin ǵana emes, tutas Qazaqstannyń imidji úshin mańyzdy ekenin aitty.
– Basty mindetimiz – qoǵamdyq qaýipsizdikti qamtamasyz etip, qoǵamdyq tártipti saqtaý jáne túsirilim jumystarynyń kedergisiz ótýine jaǵdai jasaý. Mundai jobalar elimizdiń halyqaralyq bedelin arttyrady. Sondyqtan barlyq qyzmetter zań talaptaryn qatań saqtap, úilesimdi ári kásibi jumys isteýi qajet, – dedi ol.
Keńes barysynda túsirilim alańdarynyń qaýipsizdigi, jobaǵa qatysýshylardy súiemeldeý, kólik qozǵalysyn retteý, jergilikti atqarýshy organdar jáne uiymdastyrýshylarmen ózara is-qimyl máseleleri talqylandy. Sondai-aq yqtimal tótenshe jaǵdailar kezinde áreket etý algoritmderi de naqtylandy.
Politsiia departamenti kúshter men tehnikany jumyldyrý tártibin, vedomstvoaralyq ózara is-qimyl tetikterin jáne qoǵamdyq tártipti saqtaýǵa baǵyttalǵan profilaktikalyq sharalar keshenin aldyn ala bekitti.
Eske salaiyq, buǵan deiin Mańǵystaý oblysynda Djeki Channyń qatysýymen túsiriletin «Dospehi Boga 4: Ýltimatým» halyqaralyq kino jobasynyń jumysy bastalǵany habarlanǵan bolatyn. Sondai-aq Mádeniet jáne aqparat ministri Aida Balaeva akterdi Qazaqstandaǵy túsirilimniń bastalýymen quttyqtaǵan edi.
