Qazaqstannyń eks-prezidenti Nursultan Nazarbaevtyń ortanshy qyzy Dinara Nazarbaeva men onyń kúieýi Timýr Qulybaevqa qatysy bar kompaniialar Germaniianyń Zeelo qalasynda 100 million eýroǵa baǵalanǵan villaǵa, hansaraiǵa jáne eki meimanhanaǵa ielik etedi.
Bul týraly Deutsche Welle (DW) basylymy habarlady, dep jazady Azattyq.
Málimetke qaraǵanda, 19 ǵasyrda Zeelodaǵy hansarai belgili orys diplomaty, qupiia keńesshi Mihail Hreptovichtiń jazǵy rezidentsiiasy bolǵan. Onyń qazaqstandyq jańa qojaiyndary on jyl boiy qaita jóndeý jumystaryn júrgizip, qurylysty eki jyl buryn ǵana aiaqtaǵan.
Onda fontandar ornatylǵan landshaftty saiabaq jáne 1 myń sharshy metr jerdi alyp jatqan spa alańy bar. 25 metrlik bassein ústindegi tereze spýtnikten túsirilgen sýretterden de kórinip tur.
Bul múliktiń baǵasy 60 million eýro. Jýrnalister Germaniiadaǵy kompaniialardyń reestrine silteme jasap, obektide rekonstrýktsiia jumysyn júrgizgen jyldary Schloss Seelach Invest kompaniiasynyń jarǵylyq kapitaly da dál osyndai somaǵa kóbeigenin bildiredi.
Úidi qaita jóndeý jumysyna qatysqan adamdardyń biriniń aitýynsha, úi ieleri bul úshin "aqsha aiaǵan emes". Jumysshylar árbir atqarǵan jumystaryn sýretke túsirip, Qazaqstanǵa jiberip otyrǵan.
Budan bólek, Nazarbaevtardyń otbasyna villa men eki meiramhana tiesili. Hansaraiǵa ielik etetin Schloss Seelach Invest GmbH kompaniiasy Verus Praedium International qazaq kompaniiasyna tiesili. Óz kezeginde oǵan "Almatydaǵy "Kipros" kompaniiasy ielik etedi. Ashyq reestrdegi tizimge sáikes, Timýr Qulybaev Schloss Seelach Invest GmbH kompaniiasynyń benefitsiary bolyp sanalady.
Ol reestrge sáikes, Timýr jáne Dinara Qulybaevalar Qazaqstandaǵy Mercury Properties kompaniiasy arqyly Germaniiadaǵy Bühlerhöhe Castle Invest GmbH kompaniiasyna ielik etedi. Bul kompaniiaǵa Germaniiadaǵy eki meimanhana tiesili.
Copyright (c) 2013. RFE/RL, Inc. Reprinted with the permission of Radio Free Europe/Radio Liberty, 1201 Connecticut Ave., N.W. Washington DC 20036.
