Mindetti áleýmettik meditsinalyq saqtandyrý júiesine engen bir million teńge jalaqysy bar azamat pen 40 myń teńge jalaqy alatyn azamatqa birdei meditsinalyq kómek kórsetiledi. Bul týraly eńbek jáne halyqty áleýmettik qorǵaý ministri Tamara Dúisenova Shymkenttegi oblys ákimdiginde ótken áleýmettik máselelerge arnalǵan jiynnan soń aitty, dep habarlaidy Azattyq tilshisi.
Ministrdiń sózinshe, Ońtústik Qazaqstan oblysynda jumysqa qabiletti 424 myń adamnyń basym bóligi "ózin-ózi nátijeli jumyspen qamtyǵan" azamattar. Ózin-ózi jumyspen qamtyp júrgen azamattarǵa salyq inspektsiiasyna tirkelýi tiis.
- Aiyna 1414 teńgeden, jylyna barlyǵy 18 myń teńge tólese tolyq qajetti meditsinalyq kómekti alady. Eger 2018 jyldyń qańtar aiyna deiin úlgermese ózin-ózi nátijeli jumyspen qamtyǵan azamattar 2020 jylǵa deiin emhana kómegin memleket tarapynan tegin alady. Josparly statsionarlyq kómekti óz qarajatyna alady, - deidi Dúisenova.
Ministr mindetti meditsinalyq qordyń ortaq bolatynyn, ol dúniejúzindegi tájiribege sai qurylǵanyn aitady.
- Ortalyqtandyrylǵan meditsinalyq qor deimiz. Kim aýyryp qaldy soǵan tolyq meditsinalyq kómek beriledi. Mysaly, bir azamattyń eńbekaqysy 60 myń teńge. Qarajaty óte az jinalǵan. Biraq oǵan kardiohirýrgiialyq ota jasaý kerek. Ol 10 million teńge turady. Óz qarajatyna jasata almaidy. Basqa azamattardan túsken qarajatty paidalanyp tolyq meditsinalyq kómek beriledi. Million teńge jalaqysy bar azamat meditsinalyq kómekti tolyq alyp, 40 myń teńge jalaqysy bar adam meditsinalyq kómek ala almaýy múmkin. Meditsinalyq saqtandyrý júiesiniń eń negizgi printsipi – bir jerge bir qorǵa jinap, kimge qandai kómek kerek sony ýaqytyly kórsetý, - deidi Tamara Dúisenova Azattyqqa.
Qazaqstanda jumys berýshiler men jeke kásipkerler shildeniń 1-inen bastap mindetti áleýmettik meditsinalyq saqtandyrý qoryna jarna aýdara bastaǵan. Resmi derek boiynsha, qazirge deiin qorǵa 800 million teńge túsken. Zań boiynsha, jumys berýshi ai saiyn jumyskerdiń jalaqysynan 1 paiyz mólsherinde, biraq 3668, 9 teńgeden joǵary emes aýdarym jasaýǵa, jeke kásipkerler men olarǵa teńestirilgen tulǵalar – jeke qorǵaýshylar men notariýstar, kásibi mediatorlar ailyq jalaqysynan 5 paiyz nemese 2445, 9 teńge tóleýge tiis.
