«Eńbek resýrstaryn damytý ortalyǵy» AQ (ERDO) prezidenti Tamara Dúisenova Dýbai qalasyndaǵy VI Bilim sammiti aiasynda ótken «Turaqty úkimetter» sessiiasy barysynda Qazaqstandaǵy eńbek naryǵyn jańǵyrtý týraly baiandady, dep habarlaidy "Ult aqparat".
Biyl Bilim sammiti «Turaqty damý» taqyrybyna arnalǵan. BAÁ-de ótkizilip jatqan is-sharaǵa 5000-nan astam qatysýshy jáne ár elden 400 spiker qatysty. Delegattar daǵdylardy damytý, jastardy damytý, jumysqa ornalastyrý, ulttyq damý, qaldyqtardy basqarý, jasyl ekonomika, taza energiia, klimattyń ózgerýi jáne búkil álemge qatysty basqa da ózekti máseleler siiaqty taqyryptardy talqylady. Sammittiń 2 kúni ishinde 150-ge jýyq tikelei parallel sessiia ótti.
«Turaqty úkimetter» sessiiasynda úkimetter men el kóshbasshylarynyń turaqty strategiialardy alǵa jyljytýǵa jáne turaqty damýǵa yqpal etýin egjei-tegjeili qarastyrýǵa arnalǵan sessiiada ERDO AQ prezidenti Tamara Dúisenova sóz sóiledi. Ol qatysýshylarǵa Qazaqstan Respýblikasynyń Tuńǵysh Prezidenti Nursultan Nazarbaev bastaǵan Qazaqstannyń Úshinshi jańǵyrýynyń erekshelikteri týraly aityp berdi. Jobany Qazaqstanda júzege asyrý úshin ekonomikany, saiasi júieni jáne azamattardyń qoǵamdyq sanasyn damytý boiynsha aýqymdy jumys júrgizilýde.
«Innovatsiia jáne ekonomikany ártaraptandyrý arqyly eńbek ónimdiliginiń ósýi eńbek naryǵynyń ózgerýin talap etedi. Óz kezeginde, eńbek naryǵyndaǵy ózgerister bilim júiesine qoiylatyn talaptardyń artýyna alyp keledi. Bizde kásibi kadrlardyń bolýy eldi tolyq jańǵyrtý tabysyn aiqyndaidy, óitkeni óz salasynyń mamandary joǵary áleýmettik jaýapkershilikke ie jáne olar innovatsiialar men kásipkerlikke ashyq», – dedi ERDO basshysy.
Sonymen qatar, spiker Ulttyq biliktilik júiesin halyqaralyq standarttarǵa sáikestendirý úshin kásibi kadrlardy daiarlaýdyń birqatar quraldarynyń iske qosylyp jatqandyǵyn atap ótti. Sondai-aq, salalyq úrdisterdi, halyqaralyq jáne ulttyq boljamdardy eskere otyryp, kásibi standarttar qaralýda.
«Mamandyqty durys tańdaý adamnyń ómir súrý sapasy men bilim deńgeiine áser etetin áleýmettik turaqtylyqtyń basty faktory bolyp tabylady. Sondyqtan, jekelegen kásipterdiń paida bolýyn nemese joǵalýyn eskere otyryp, elimizde kásipterdiń atlastary ázirlenýde. Bizdiń josparlarymyz olardy IT-tehnologiialar, mashina jasaý, týrizm, energetika siiaqty jáne basqa da salalar úshin ázirleý», – dedi Dúisenova.
ERDO prezidenti qatysýshylarǵa habarlaǵandai, ázirlenip jatqan quraldarǵa súiene otyryp, akademiialyq daiarlyqta da, Qazaqstandyqtardy onlain-oqytýda de qoldanylatyn bilim berý baǵdarlamalary qaita qaralatyn bolady. Halyqaralyq deńgeide Qazaqstannan sertifikattardy taný boiynsha múmkindikter qaralýda.
Qorytyndylai kele Tamara Dúisenova Qazaqstandaǵy eńbek naryǵyndaǵy jaǵdaidyń biregeiligin atap ótti, ol 1990 jyldardyń aiaǵynda-2000 jyldardyń basynda týýdyń quldyraýy saldarynan paida boldy jáne ol jas mamandardyń paida bolý sanynyń tómendeýine alyp keldi.
«Bul rette, demografiialyq boljamdarǵa sáikes, aldaǵy 3-5 jylda biz jas mamandardyń eńbek naryǵyna túsýiniń jedeldetýin kútýdemiz. Sondyqtan qazir biz úshin eńbek resýrstaryn boljaýdyń integratsiialanǵan júiesin qurý jáne eńbek naryǵynyń tepe-teńdigin qamtamasyz etý óte mańyzdy. El ekonomikasyn jańǵyrtý barysynda biz eńbek naryǵy men tutastai alǵanda jumyspen qamtý sektoryn damytýdyń jańa tujyrymdamalyq úlgisin jasap, jobalardy basqarý qaǵidattaryna kóshetin bolamyz, sonymen birge 2025 jylǵa deiin eńbek naryǵyn jańǵyrtýdyń Jol kartasyn qabyldaimyz. Osylaisha, tereńdetilgen tsifrlandyrýdy odan ári jetildirý jalǵasady. Nátijesinde, biz aldaǵy jyldary básekege qabiletti 30 eldiń qataryna kirýdi josparlap otyrmyz», – dep túiindedi sózin ERDO prezidenti.
Jyl saiynǵy Bilim sammiti – bilim almasýdyń jahandyq alańy, onyń qorytyndysy boiynsha «Arab Bilim Jobasy» 2019 jyly Jahandyq Bilim indeksin (Global Knowledge Index) jáne bolashaq bilimdi boljaý týraly baiandamany (Knowledge Foresight Report) iske qosady.
