Foto: primeminister.kz
Eńbek jáne halyqty áleýmettik qorǵaý ministri Tamara Dúisenova 2029 jyldan bastap zeinetkerlik jasy qalai ózgerýi múmkin ekenin aitty, dep habarlaidy Sputnik Qazaqstan.
Senattyń jalpy otyrysynda Áleýmettik kodeks jobasyn qaraý barysynda depýtattar ministrden "áielderdiń 58 jasta zeinetke shyǵýy týraly normany qaitarý josparda bar ma?" dep surady.
"2018 jyldan bastap áielderimiz 58 jastan beri qarai ótip ketti. Qazir olardyń sany 500 myńnan asady. Eger biz oǵan qaitatyn bolsaq, sol azamattardyń zeinetaqysyn qaita esepteý qajet bolady. Bul zeinetaqynyń kóbeiýine emes, kerisinshe azaiýyna alyp keledi. Sondyqtan osyndai táýekel bolmas úshin 61 jas durys dep toqtadyq", - dedi Dúisenova.
Ol pandemiiadan keiin azamattardyń densaýlyǵy men ómir súrý uzaqtyǵyna bailanysty áleýmettik qamsyzdandyrý júiesine ózgeris engizilgenin atap ótti. Nátijesinde biyl qańtardan bastap zeinet jasy 2028 jylǵa deiin 61 jas dep bekitildi.
"Jalpy azamattardyń zeinetke shyǵý jasy ómir súrý uzaqtyǵyna jáne zeinetaqynyń deńgeiine bailanysty bolady. Sondyqtan aldaǵy bes jylda densaýlyq saqtaý salasy boiynsha úlken ulttyq joba júrgizilgeli jatyr. Onyń eń negizgi máselesi – aýyldyq meditsinany jaqsartý. Sodan keiin kópsalaly aýrýhanalardy kóbeitý, mamandandyrylǵan meditsinalyq kómekti jaqsartý, erte skrining, telemeditsina máseleleri bar. Eger osynyń nátijesinde azamattardyń ómir súrý jasy uzarsa, onda zeinet jasy 2029 jyldan keiin qaita qaralady. Eger de dál osylai qalyp nemese kerisinshe tómendese, árine onda jas shegi qaita qaralady", - dep túsindirdi ministr.
Sonymen qatar Dúisenova qazir Prezident tapsyrmasymen aýyr ári ziiandy eńbekte isteitin azamattardyń zeinetke shyǵý jasyn qarastyrý úshin jumys toby qurylǵanyn atap ótti. Jaqynda ministrlik tujyrymdamany jariialaidy.
