Foto: ashyq derekkóz
«Záke, sen meni keshir! Men sharshadym» dep, sharshańqy, álde masańqy kúide muńyn shaqqan Maqpal Júnisovanyń videosy áleýmettik jelilerdi shýlatqanyna kóp ýaqyt ótken joq. Tanymal ánshiniń kóńiline qaiaý túsiretin nendei jaǵdai boldy dep, óner adamdary óre túregeldi. Qoldap jazbalar jazdy, qorǵap, dushpandardan arashalap aldy. «Jaqsy adamǵa shań jýymaidy» deidi ǵoi, dattaǵandar bolǵanymen, halyq súiiktisiniń jaǵyna shyǵyp, qoldaǵandar qarasy odan da kóp boldy. Ánshi «Din Dina Show» baǵdarlamasynda aǵynan jarylyp, keiingi kezderi mazalap júrgen ne jaǵdailar ekenin aityp berdi.
Atyshýly videoda ánshi Zamanbek Nurqadilovten qalǵan eki záýlim úidi atap ótedi. Ol osy eki úidi kútip-baptaimyn dep sharshaǵanyn da aitty. "Pesh atylyp jatsa, úidiń bári azynap tursa, qalai sharshamaisyń?" deidi ánshi. Záýlim úilerdi satpaýǵa Zákeńniń amanaty kedergi bolyp turǵan syńaily:
"Úidi satpaityn boldym. Zákeńniń óz elinde murajai ashpaqshy eken. Dúniesin sol jaqqa tapsyramyn. Jartylai berip jiberdim. Ol úidiń bireýin Mereige ataǵan. «Mereidi osy jerden uzatamyn» dedi. Kúieýge shyqqannan keiin osy jerde turady dedi. «Osy úide uzatamyn» degen áńgimesin búkil týysqandar biledi, tanystar biledi, bári estigen. Men de endi Mereidi uzatamyn dep sol úidi saqtap otyrmyn", - deidi ánshi.
Al videolar seriiasynan keiingi heitke Maqpal Júnisova tik turyp, tótep bergenin aitady. Keshirim suraýǵa da jónim joq dep otyr.
"Men keshirim suraityndai, eshkimniń basyn jarǵan joqpyn, eshkimdi atqan joqpyn. Heit maǵan aýyr tigen joq. Men mundaiǵa úirengenmin. Sol videodan keiin talai jerge baryp án aityp keldim. Eshkim maǵan eshteńe degen joq. Sondyqtan da dushpandarǵa da mereke syilap turý kerek anda-sanda", - dep ázildedi ánshi.
Maqpal Júnisova birneshe jyl buryn da, áleýmettik jelini shýlatqan video jariialap, sózge qalǵany bar. Onda qyzyna bar shyndyqty aitqanyn, sodan keiin ekeýi arasynda janjal týyndaǵanyn aityp, halyqqa muńyn shaqqan edi. Keiin túsindirgendei, ol týǵan baýyrynyń qyzyn asyrap alǵan.
"Maǵan baýyrdyń balasy aýyr bolǵan joq. Men ony alamyn dep te oilaǵan joqpyn. Josparlap, baýyrymyzdyń balasyn alaiyq degen oida da bolmaǵan dúnie. Kelin eki qyz týǵan ǵoi, sodan úshinshisi de qyz bolǵanda baýyrym «Tórkinińe ket» dep, áńgime aitady. Sol áńgimeni estigende, men úide ashýlanyp, Zákeńe: «Qudai-ai, bizge bala bermei jatqanda, mynalardyki ne áńgime?» degende, Zákeń «Osy sátti paidalanyp qalaiyq, sen de baqytty bolshy» dep, ana qyzdy alyp kettik. Qyz kelgen soń ómirimiz keremet bolyp ketti, shyny kerek. Ózim týǵandai boldym. Eshki satyp alyp, ózim saýyp, eshkiniń sútimen ósirdim. Zákeń de bir týysqandy jolatpai, aýyrtyp qoiasyńdar dep, qatty jaqsy kórdi. Zákeń ózi oǵan massaj jasap, ózi jýyndyryp, onymen oinap, bala siiaqty júretin edi", - dep eske aldy Júnisova.
Qyzyna shyndyqty aitýǵa Zákeńniń amanaty sep bolǵan. Kózi tirisinde qairatker qyzy 18-ge tolǵanda bar shyndyqty aitamyn dep sóz bergen eken.
"Qyz 18-ge tolǵanda men aita almadym. 20-ǵa jaqyndaǵanda aittym ǵoi deimin. Ol endi ósti ǵoi, jigitter kezdesýge shaqyrady, tanysady. Elim «Alban» deidi, biraq ol Alban emes qoi, Qarakesektiń qyzy, Arǵyn. Sodan keiin shyndyqty aitýǵa bel býdym. Ol óziniń tegin, óz rýyn bilýi kerek. Erteń kúieýge shyqqanda ómirin ótirikten bastai ma?", - deidi ánshi.
Tanymal tulǵa, múiizi qaraǵaidai saiasatkermen bas qosamyn dep, ánshiniń taǵdyry synaqtarǵa toly bolǵan syńaily. Ánshi mundai taǵdyrdy áý basta qalamaǵanyn da jetkizdi.
"Onyń esigin qaǵyp, baiǵa shyǵamyn degen joqpyn. Ol kisi ózi maǵan ǵashyq boldy da, ol óziniń degenin jasady. «Seni shesheń berse de, bermese de, seni alamyn» dedi, boldy. Qolynda biligi boldy, artynda biz qorqatyn adamdar boldy. Biz qoryqtyq odan, shyny kerek. Keiin 1-2 jylda syilastyq keldi", - dep áńgimeleidi otbasylyq ómiri týraly.
Qoǵam qairatkerimen synaqqa toly ómirinde tipti qastandyqqa da tap bolǵanyn aitady. Muny kúieýiniń dushpandary emes, týǵan qyzy jasaǵany da kóńiline qaiaý túsirip, jyldar boiy jalǵasqan dushpandyqqa ákeldi.
"Respýblika Saraiynyń janynda, kontserttiń aldynda Quralai pyshaqtap ketken. Pyshaq qolyma tidi, áli de tyrtyq bar. Kontsertten keiin «Maqpal, prezidentke deiin jetipti. Erteń militsiia keledi, meniń qyzym dep jazbashy» degen Zákeńnen ótinish hat keldi. Sol kezde "Zákeń eliniń azamaty ǵoi, tiri qaldyq qoi, áiteýir" dep onyń qyzy emes dep jazyp berdim. Sińlim Maral janymda turyp, «Erteń óltirip ketse kim jaýap beredi?» dep urysty maǵan. «Qalanyń dardai bastyǵy, obal ǵoi sondai azamatqa. Halyqqa qandai jaqsylyq jasap jatyr» dep, men jasóspirimder qastandyq jasady dep jazyp berdim. Ákesiniń abyroiyn oilap, ony keshirdim. Biraq ol muny túsindi me?", - dep kúiindi Júnisova.
2 jeltoqsanda Almaty oblysy Kegen aýdanynyń ortalyǵynda Zamanbek Nurqadilovke arnalǵan eskertkish-biýst ashyldy. Saltanatty jiynǵa qoǵam qairatkeriniń úlken uly men qyzy qatysty. Alaida, ómiriniń sońynda janynda bolǵan jary - Maqpal Júnisova sharada kóringen joq.
"Ózin-ózi atty degen nárse áli tur ǵoi. Soǵan qaramastan baryp eskertkish ashamyz deidi. Sondai tirilip kele me ol kisi?", - deidi ánshi.
Oqi otyryńyz: "Maqpaldy aqtamańdar": Óner adamdary Maqpal Júnisovaǵa qoldaý bildirip jatyr
