«Atameken» UKP basqarma tóraǵasy Abylai Myrzahmetov Qazaqstanda tótenshe jaǵdai rejiminiń mamyrǵa deiin sozylýyn jaqsy habar retinde qabyldaǵanyn málim etti, dep habarlaidy QazAqparat.
«Menińshe, bul - óte durys sheshim. Óitkeni sarapshylardyń báriniń osyǵan deiin orta eseppen 15 mamyrǵa deiin tótenshe jaǵdai aiaqtalady degen boljamy bolǵan edi. Prezident 11 mamyrdan bastap tótenshe jaǵdai rejimi aiaqtalatynyn aitty. Bul - jaqsy habar», - dedi Abylai Myrzahmetov Ulttyq kásipkerler palatasynyń Facebook paraqshasynda onlain rejimde sóilegen sózinde.
Palata basshysy degenmen qaýip baryn umytpaý kerektigin de tilge tiek etti.
«Sondai-aq 1 mamyrdan bastap Nur-Sultan men Almaty qalalarynda áýe reisteri iske qosylatyny aityldy. Osyǵan deiin meditsina mamandary adamdardyń arasyndaǵy eki metrlik qashyqtyqtyń saqtalýy kerektigin sanamyzǵa quidy. Adamdar bul rette ushaqqa maska kiip kelýi kerek. Olardyń temperatýrasy ólshenedi. Meniń oiymsha, osy tártiptiń bárin saqtaý úshin bálkim bir sanitarlyq sertifikat tapsyrý máselesin qolǵa alý kerek bolar. Óitkeni jaýapkershilikpen birge ony qadaǵalaityn da ereje bolýy tiis. Osynyń bárin tutynýshylar, olarǵa qyzmet kórsetýshiler, taýar satýshylar jáne kásipkerler – bárimiz naqty saqtaityn bolsaq, qaýipti derttiń ary qarai asqynýyna jol bermeimiz», - dedi ol.
Eske sala ketsek QR Prezidenti Qasym-Jomart Toqaev tótenshe jaǵdai rejimin biylǵy 11 mamyrǵa deiin uzartý jóninde sheshim qabyldady. Bul týraly Memleket basshysy búgingi málimdemesinde aitqan bolatyn.
