Jenevadaǵy Dúniejúzilik saýda uiymynyń bas keńesi uiymnyń basshysy qyzmetine Nigeriia ókili Ngozi Okondjo-Ivealanyń kandidatýrasyn maquldady, dep habarlaidy Euronews agenttigi.
Nigeriianyń burynǵy qarjy ministri jańa qyzmetine 1 naýryzdan bastap kirisedi.
Óziniń aitýynsha, Okondjo-Iveala eń aldymen álemdik saýdanyń koronavirýs pandemiiasynan keiin qaita qalpyna kelýine erekshe mán beredi.
Jańa tóraǵa Dúniejúzilik saýda uiymynyń qazirgi ýaqytta kóptegen problemamen betpe-bet kelip otyrǵanyn eske saldy. Onyń sózine sensek, uiymdasqan nátijeli jumys bul uiymdy áldeqaida qýatty, búgingi kúnge beiimdelgen belsendi etedi.
«Bul jol óte uzaq, aýyr jáne belgisizdikke toly boldy. Biraq jańa kún týdy, endi naǵyz jumysty bastaýǵa bolady. Búginde Dúniejúzilik saýda uiymyna múshe memleketter tarihty óz qolymen jasap otyr - uiym qurylǵan 73 jyldan beri alǵash ret áiel adam, Afrika ókili basshylyqqa keldi. Bul - naǵyz serpilis. Men jaqsylyqqa senem» dedi Ngozi Okondjo-Iveala.
Jańa tóraǵany Eýrokomissiia basshysy Ýrsýlýa fon der Liaien quttyqtady. Ol óz quttyqtaýynda bul sáttiń tarihi mańyzyn erekshe atap ótken.
Fon der Liaienniń aitýynsha, Eýroodaq Dúniejúzilik saýda uiymynyń reformasyn jaqtaidy jáne erejege negizdelgen kópjaqty saýda júiesin qorǵaýǵa kómektesedi.
Aita keteiik, uiym basshysynyń laýazymy ótken jyldyń 31 tamyzynan beri bos turǵan bolatyn. Sońǵy tóraǵa RobertýAzevedý sol kúni basshylyq ýaqyty aiaqtalmasa da, qyzmetinen ketti.
