Dúniejúzilik densaýlyq saqtaý uiymy (DDU) birneshe dini merekeler – Pasha, Pesaha jáne Ramazanǵa orai olardy koronavirýs infektsiiasyn juqtyrý qaýipinsiz atap ótý boiynsha tájiribelik nusqaýlyqtar berdi, dep habarlaidy QazAqparat uiymnyń resmi saityna silteme jasap.
BUU Bas hatshysy Antoniý Gýterrish bul merekeler – birigý sátteri ekenin atap ótip, «Bul – otbasylar birge jinalatyn ýaqyt. Qushaq ashyp, qol alysatyn, adamdardy rýhani biriktiretin ýaqyt. Biraq osy joly ádettegidei emes, bári basqasha», - dedi ol.
«Qazirgi kezde biz jolymyzdy ápendi, siýrrealistikalyq álemde tabýǵa tyrysyp kelemiz. Únsiz kósheler áleminde. Vitrinalary tas jabyq álemde. Bosaǵan dini ǵimarattar áleminde. Jáne de úrei basqan álemde», - dedi A.Gýterrish.
DDU-da atap ótilgendei, din kóshbasshylary halyqtyń qurmeti men senimine bólengendikten, olar koronavirýstyń taralmaýyna mańyzdy úles qosa alady.
«Shirkeýler, sinagoga jáne meshitterde adamdardyń jinalýyna kelsek, sarapshylar munda ulttyq bilik bergen keńesterdi ustanýǵa shaqyrady. Barýǵa ruqsat etilse de, qatań sanitarlyq-gigienalyq sharalardy saqtaý: bir-birinen bir metr jerde júrý, adamdardy ustamaý, bir-birin súimeý jáne qasietti zattarǵa mańdaidy tigizbeýge keńes etiledi», - delingen aqparatta.
DDU málimetinshe, eger dini oshaqtarǵa kelýshilerdiń qaýipsizdigin qamtamasyz etý múmkin bolmasa, dini joralǵylardy ótkizýden bas tartý nemese olardy qashyqtan ótkizý múmkindigin qarastyrý kerek.
«Rýhani kúshti bul kieli oqiǵalardyń ózinen alyp, olardy oilaný, eske alý jáne jańarý múmkindigi retinde paidalanaiyq. Bul qaýipti virýspen kúreste aianbai ter tógip júrgen qaharman meditsinalyq qyzmetkerler, qalalar men kentterimizde eńbektenip júrgen barlyq adamdar týraly oilarǵa erekshe oryn qaldyraiyq», - dep shaqyrdy BUU Bas hatshysy. Sondai-aq ol virýstyń aldynda dármensiz qazir soǵys aimaqtarynda júrgen adamdar, bosqyndar týraly umytpaýdy surady.
Aita keteiik, biyl Ramazan aiy 25 sáýirde bastalady. Pravoslam hristiandary Pasha merekesin 19 sáýirde toilaidy. Al evreilerdiń bir aptaǵa sozylatyn Pesah meiramy 8-16 sáýir aralyǵynda ótedi.
