Dúniejúzilik banktiń Direktorlar keńesi Vashingtonda (AQSh) Qazaqstan úshin daiyndalǵan «Mal sharýashylyǵyn turaqty damytý» jobasyn qarjylandyrý týraly sheshim qabyldady, dep habarlaidy "Ult aqparat" QR Aýyl sharýashylyǵy ministrliginiń baspasóz qyzmetine silteme jasap.
Kelesi qadam - tiisti nesie kelisimine qol qoiý. Boljam boiynsha ol aǵymdaǵy jyldyń kúzinde ótedi.
Joba sharty boiynsha respýblikaǵa mal sharýashylyǵyn jan-jaqty damytýǵa 500 million AQSh dollary bólinedi. Bank ázirlegen jospar 5 jyl ishinde - 2021 jyldan 2025 jylǵa deiin júzege asyrylýy kerek. Osy kezeńde Qazaqstan qorshaǵan ortaǵa teris áserin tigizbesten, mal etin óndirýdiń eksportqa baǵyttalǵan sektoryn damytýǵa jáne kóbeitýge mindetti.
Jobany iske asyrýda Qazaqstan úshin múldem jańa qarjy quraly - nátijege baǵyttalǵan baǵdarlama (NBB) nesiesi qoldanylady. Bul mehanizm qaryz alýshyǵa qarajat kelisilgen nátijege jetken kezde ǵana tólenetin bolady.
Jobanyń negizgi nátijesi veterinarlyq qyzmetter men janýarlardy tirkeýdi jaqsartý jáne et salasy úshin tiimdi agroekologiialyq saiasat ornatý.
Sondai-aq, eksport pen básekege qabilettiliktiń turaqty ósýi úshin baqylaý júiesi jasalady, veterinariia qyzmeti jańǵyrtylyp, siyr etin ósirýmen ainalysatyn fermerlerdiń biliktiligin arttyrý júiesi qurylady.
Sonymen qatar, jumys oryndaryn qurý jáne aýyl turǵyndarynyń kiristerin arttyrý maqsaty kózdelip otyr. Bordaqylaý alańdarymen birlesip jumys jasaityn 20 myńnan astam otbasylyq fermalardy qurýdy qoldaý josparda bar.
